Almaty qalasyndaǵy Temirjolshylardyń mádenıet úıinen ashylǵan Túrksib aýdany boıynsha №33 saılaý okrýginde «Nur Otan» saıası partııasy atynan qalalyq máslıhatqa kandıdattyq tirkeý sharasy bolyp ótti.
О́ziniń ómirsheń ıdeıalary, qoǵamnyń damýyna úles qosýdaǵy eren talpynysy kóptiń kóńilinen shyqqan Lázzat Qaltaeva okrýg boıynsha irikteýden súrinbeı ótip, qalalyq máslıhatqa úmitker retinde tirkeldi. 7 jasynda jol apatyna ushyrap, arbaǵa tańylǵan úmitkerdiń ómir joly tirshilik úshin tyrmysýmen emes, qorshaǵan ortany jaqsylyqqa bólep, adamzat qoǵamyna izgiliktiń izin qaldyrsam degen adamı kúrespen ótip keledi.
17 jasynan bastap Múgedekter qoǵamynda qatardaǵy qyzmetker bolyp eńbek jolyn bastaǵan Lázzat Moldabekqyzy 1997 jyly qundy qaǵazdar naryǵynyń mamandaryn daıarlaıtyn arnaýly kýrsty támamdap, osy sala boıynsha búginde bilikti mamandardyń birine aınalyp otyr.
2001 jyly ózimen taǵdyrlas ózge de yntaly áıeldermen birlesip, «Jarymjan áıelderdiń «Shańyraq» assosıasııasy» qoǵamdyq birlestigin quryp, qazirde sol birlestikti basqaryp keledi. Jany jadaý, taǵdyry bólek áıelderdiń muń-muqtajyn qoǵamdyq deńgeıde belsene kótere bilgen L. Qaltaeva «Qazaqstan Táýelsizdigine – 20 jyl» mereıtoılyq medalimen, «Qurmet» ordenimen, BUU tarapynan taǵaıyndalatyn «Múgedekterdiń quqyǵyn qorǵaýshy tulǵa» degen halyqaralyq tósbelgimen marapattalǵan.
«Árbir qazaqstandyq óz Otanynyń ósip-órkendeýine úles qosýǵa mindetti jáne árbirimizdiń qoǵamǵa tek jaqsylyq jasaǵan izimiz qalýy kerek» deıtin ómirlik ustanymdy tý etken Lázzat Moldabekqyzy aldaǵy saılaýda jeńiske jetse, qalalyq máslıhat minberinen jarymjan jandardyń ómirine jańasha lep ákeletinine senimdi.
Qanat ESKENDIR,
«Egemen Qazaqstan».
Almaty.