Jerdi paıdalanýdaǵy jeńildikter

Ulttyq ekonomıka mınıstrligi «100 naqty qadam» Ult Josparynyń 35-qadamyn iske asyrý maqsatynda aýyl sharýashylyǵy maqsatyndaǵy jerlerdi jekemenshikke berýdi yntalandyrý úshin «Qazaqstan Respýblıkasynyń Jer kodeksine ózgerister men  tolyqtyrýlar engizý týraly» zań jobasyn ázirledi. 2015 jylǵy 2 qarashadaǵy «Qazaqstan Respýblıkasynyń Jer kodeksine ózgerister men tolyqtyrýlar engizý týraly» zań­men Jer kodeksine túzetýler engizildi. Jańa quqyqtyq normalar boıynsha AО́K-te jumys isteıtin sýbektilerge olar jalǵa alǵan jerlerdi kadastr­lyq quny­­nyń 50 % mólsherinde aıqyndalatyn jeńildik baǵamen 10 jylǵa deıin bólip tóleý arqyly alýǵa bolady. Sonymen qatar, sheteldik ınvestorlarǵa da preferensııalar belgilengen: sheteldik kompanııalar úshin jerdi jalǵa berý merzimi 10 jyldan 25 jylǵa deıin uzartylǵan. Jer kodeksine engizilgen túzetýler memleket men­shigin­degi aýyl sharýashylyǵy maqsatyndaǵy jer ýchas­ke­lerin jekemenshikke aýksıon arqyly berýdi kózdeıdi. Jer ýchaskeleri QR jeke jáne zańdy tulǵalaryna jekemen­shik quqyǵymen mynadaı retpen aýksıondarda satý arqyly be­riledi: – jer ýchaskesiniń kadastrlyq (baǵalaý) qunyn arttyrýdy kózdeıtin aýksıon arqyly; – eger eki aýksıonnyń qorytyndylary boıynsha ýchaske satylmasa, onda ol ýchaskeniń baǵasyn kadastrlyq qu­nynyń bel­gi­engen eń tómengi shegine (kadastrlyq qunynyń 50 %) deıin tómendetýdi kózdeıtin aýksıonǵa qoıylatyn bolady. Jalǵa berilgen jer ýchaskelerin satyp alý boıynsha jeńil­dik sharttary. Jer paıdalanýshylarǵa buryn berilgen aýyl sharýa­shy­lyǵy maqsatyndaǵy jer ýchaskelerin jaldaý merzimi aıaq­talǵanǵa deıin 10 jylǵa deıin bólip tóleý arqyly, olar­dyń kadastrlyq qunynyń 50 % mólsherinde aıqyn­dalatyn jeńildik baǵamen jekemenshikke satyp alýǵa quqyq beredi. Jalǵa alynǵan aýyl sharýashylyǵy maqsatyndaǵy jerlerdi paıdalaný boıynsha shekteýler alyp tastalady. Norma jerdi paıdalanýshylarǵa jalǵa alý quqyǵymen qu­qyqtyq mámileler jasasýǵa, atap aıtqanda, bankke kepilge berýge, jaldaý merzimi ishinde ıelikten shyǵarýǵa (qosalqy jaldaýǵa tabystaýdan basqa) múmkindik beredi. Zańmen engizilgen ózgerister 2016 jylǵy 1 shildeden kúshine enedi. Ulttyq ekonomıka mınıstrligi Ekonomıka ınfraqu­ry­­lymyn damytý departamenti dırektorynyń orynbasary Gýljahan Bımendına «Zańnyń qabyldanýy agrarlyq sektordyń damýyna, jumys oryndaryn qurýǵa, sondaı-aq, aýylsharýashylyq óndirisine qosymsha ınvestısııalardy tartýǵa múmkindik týǵyzady», dep túsindirdi. «Egemen-aqparat».