Qazaq kúresi Azııa oıyndaryna qosyldy

Jaqynda Túrkııanyń Ystambul qalasynda Dúnıejúzi kúres túrleri qaýymdas­tyǵynyń (United World Wrestling) forýmy ótti. Osy jıynda qazaq kúresi jabyq ǵımaratta ótetin Azııa oıyndarynyń baǵdarlamasyna kirdi. Bul jarys 2017 jyly Túrikmenstannyń Ashǵabad qa­lasynda ótedi. Al bıyl 22-24 maýsym kúnderi osy qalada tól kúresimizden synaq túrinde beldesýler ótkiziledi. Ystambulda ótken forýmǵa Qazaqstan atynan Dúnıejúzi qazaq kúresi federasııasynyń birinshi vıse-prezıdenti, Azııa federasııasynyń prezıdenti Marat Shámshinurov qatysyp, tól kúresimizdiń tarıhy, qazirgi kez­degi damý deńgeıi týraly baıan­­dama jasady. Jıynda Qa­zaq­stan ókiliniń baıan­damasy kóptiń kóńi­linen shyǵyp, ulttyq kúresimiz biraýyzdan jabyq ǵımaratta ótetin Azııa oıyndarynyń baǵdar­lamasyna qosyldy. – Forýmǵa 100-den as­tam ulttyq kúres túrleriniń fe­derasııalarynyń ókilderi qa­tysty. Onyń ishinde alysh, tatar kúresiniń, syrym kúre­siniń basqa da kóptegen ulttyq kúres túrleriniń ókilderi boldy. Syrym – ıran kúresi. Osy jıynda bizdiń el taǵy bir maqsatyna jetti. Qazaq kú­resi jabyq ǵımaratta ótetin Azıadanyń baǵdarlamasyna kirdi. Endi bıyl jazda Ashǵabad qalasynda synaq jarystary ótedi. Onda Azııa olımpııalyq komıtetiniń prezıdenti ál-Sabah pen Dúnıejúzi kúres túrleri qaýymdastyǵynyń prezıdenti Nenad Lalovıch bastaǵan top qazaq kúresiniń beldesýlerine baǵa­laryn beredi, – dedi M.Shám­shinurov. Onyń aıtynsha, eger qazaq kúresi synaq jarystardan sú­rinbeı ótse, onda Jazǵy Azııa oıyndarynyń baǵdarlamasyna kiredi. Bul jarys 2018 jyly Indonezııanyń Djakarta qala­synda ótedi. Dastan KENJALIN. «Egemen Qazaqstan».