«Aýyl» jaýapty naýqanǵa daıyn

Keshe Astanada «Aýyl» halyqtyq-demokratııalyq patrıottyq partııasynyń respýblıkalyq qoǵamdyq shtaby buqaralyq aqparat quraldarynyń ókilderine arnap brıfıng ótkizdi. Jıynda partııanyń saılaý naýqanyndaǵy úgit-nasıhat jumystaryna daıyn ekendigi aıtyldy. Brıfıngte «Aýyl» partııa­synyń respýblıkalyq qoǵamdyq shtaby tarapynan saılaý naý­qanyna daıyndyq baǵytynda birqatar sharalar atqarylǵany belgili boldy. Respýblıkalyq qoǵamdyq shtab jetekshisi Rústem Jolaman málim etkendeı, barlyq aımaqtyq shtabtardyń jumysy shıraı túsken. Shtab músheleri úgit jumystaryn júrgizýdiń ereje-talaptaryn bilip, qyr-syryna qanyqqan, sondaı-aq, zańgerler shtab qyzmetkerlerine «Saılaý týraly» Zań talaptaryn túsindirgen. «2016 jyldyń 4 aqpanynda «Aýyl» partııasynyń res­pýb­lıkalyq qoǵamdyq shtaby quryl­dy. Sol kúnnen bastap shta­by­myz kúndiz-túni júıeli túrde jumys istep keledi. Dál osyndaı qoǵamdyq shtab bizdiń ózge de oblys, aýdandarymyzda belsendi jumys júrgizip jatyr. Respýblıkalyq qoǵamdyq shtabqa partııanyń belgili múshe­leri men qoǵam qaıratkerleri, úki­mettik emes uıymdardyń basshylary, qoǵam belsendileri engen. «Aýyl» partııasynyń res­pýb­lıkalyq qoǵamdyq shtabynyń bas­ty maqsaty – saılaý naýqanyn tıimdi uıymdastyrý, «Aýyl» partııasynyń saılaýaldy baǵdarlamasyn nasıhattaý jáne túsindirý. Sonymen birge, saılaý qoryn qalyptastyrý, qordaǵy qarajattyń maqsatty túrde jumsalýyn qadaǵalaý jáne senim bildirilgen adamdar men Májilis depýtattyǵynan úmitkerlerdiń jumys josparyn daıyndaý shtab­tyń negizgi mindetterine jatady. Bul jumystardyń barlyǵy búginde shtab tarapynan júıeli túrde júrgizilip keledi. Máselen, saılaý naýqany kezinde qandaı da bir zań buzýshylyqtar oryn almaýy úshin shtabymyzda osy jyldyń 10 aqpanynda barlyq aımaqtaǵy shtab jetekshileri men múshelerine arnalǵan onlaın-trenıng ótti. Trenıngte zańgerler «Saılaý týraly» Zańnyń negizgi talaptaryn túsindirip berdi. Sonymen qatar, úgit-nasıhat jumystaryna qatysty zańnamalyq shekteýler týraly da aıtyldy. Buǵan qosa, úgit-nasıhat jumystaryna qajetti kórneki quraldardy arnaıy belgilengen oryndarǵa ja­bys­tyrý, bılbordtar ilý, únpa­raqtar taratý talaptary jaıly da tolyq túsindirildi», – dedi res­pýblıkalyq shtab jetekshisi. Sonymen qatar, R.Jolaman bar­lyq aımaqtyq shtabtarǵa úgit-nası­hattyq ónimder, plakattar men únparaqtar, partııanyń saı­laýal­dy baǵdarlamalary qajetti mól­sherde tolyq jetkizilgenin atap ótti. «Barlyq aımaqtyq shtabtarǵa qajetti úgit-nasıhat materıaldary jetkilikti deńgeıde berildi. Sol úshin biz 16 myń plakat, 16 myń únparaq, 3200 dana partııamyzdyń saılaýaldy baǵdarlamasyn basyp shyǵardyq. Bulardan bólek, biz logotıp basylǵan keýdeshe­ler, bas kıimder, jalaýsha, moıyn­ora­ǵyshtar daıyndadyq», – dedi ol. Sondaı-aq, brıfıngte úgit-nası­hat naýqany bastalǵan kez­de partııa ókilderi barlyq aımaq­tardy aralap, eńbek ujymdary­men kezdesýler ótkizip, flesh-mob­tar jáne túrli aksııalar uıym­das­tyrýdy kózdep otyrǵany sóz boldy.