Jambyl oblysy ótken jyldy úlken tabyspen qorytyndylady. Kórsetkishterinde keri ketken jeri joq. Barlyq salada ósim bar. Bul týraly Jambyl oblysynyń ákimi Kárim Kókirekbaev keshe halyq aldynda bergen eseptik jıynynda jan-jaqty baıandady. О́tken jyly oblystyń ónerkásip kásiporyndary 274,5 mlrd. teńgege ónim shyǵardy. Aýyl sharýashylyǵynda barlyǵy 172 mlrd. teńgeniń ónimi óndirildi. «Barshamyzdyń bir ǵana maqsatymyz bar – ol halyqtyń ıgiligi. 2015 jyly jalpy somasy 30,5 mlrd. teńgege 6 ınvestısııalyq joba iske asyrylyp, munda 425 jańa jumys orny quryldy. 2015 jyldyń qorytyndylary boıynsha Indýstrııalandyrý kartasy boıynsha paıdalanýǵa berilgen ınvestısııalyq jobalardan shyǵarylǵan ónimniń kólemi 3,052 mlrd. teńgeni qurap otyr», dedi Kárim Kókirekbaev.
Jyl ótken saıyn oblys ákimderiniń halyq aldyndaǵy esep berý jıyndary da etek-jeńin jıyp, utymdy túrde uıymdastyrylyp keledi. Jasyratyny joq, mundaı jıyndardyń eń bir qyzyq jeri turǵyndardyń oblys basshysyna suraq qoıyp, jaýap alýy bolsa kerek. Jınalǵan jurt ýaqytty tıimdi paıdalanýǵa úırengen. Sóz sóıleýge shyqqandar ákimdi maqtap nemese istegen tirligin aıtyp, kópshilikti yǵyr qylsa, zaldaǵy halyq qaıta-qaıta qol shapalaqtap, tek naqty oıyńdy, usynysyńdy, máseleńdi ǵana aıtýǵa májbúr etedi. Oblys ákimi K. Kókirekbaev ta bos sózden góri naqty iske kóshkendi jón sanap, Taraz tórinde ótken bul eseptik jıynda biraz máseleler aıtyldy. Biz sonyń keıbirine toqtala kettik.
Átirkúl Isaeva,
Merki aýdanynyń turǵyny:
– Bizdi Jemis-jıdek aýylyndaǵy burynǵy «Ogonek» bala- baqshasynyń qazirgi jaǵdaıy alańdatady. Qaraýsyz qalǵan bul ǵımaratty qaıtadan jóndep, iske qossa, aýdanda balabaqsha tiziminde turǵandardyń qatary áldeqaıda azaıyp qalar edi…
Kárim Kókirekbaev,
Jambyl oblysynyń ákimi:
– Merki aýdanynyń ákimi Baqtııar Kópbosynov bul máseleni kótergen. Aýdandy aralaǵan kezde ózim de baryp kórgenmin. Balabaqsha ǵımaratyn kúrdeli jóndeýge bıyl qarjy bólindi. Aldaǵy ýaqytta paıdalanýǵa beriledi.
Quralaı Salıeva,
Taraz qalasynyń turǵyny:
– Taraz qalasynyń shetindegi «Baryshan» shaǵyn aýdanynda 2014 jyly jol jóndeý jumystary óte qarqyndy bastalyp edi. Biraq byltyrdan bastap toqtap qaldy. Bul is bıyl jalǵasyn taba ma?
– Iá, bul shaǵyn aýdandardyń joldaryn jóndeýge kezinde 142 mln. teńge bólingen bolatyn. Biraq ótken jyly Qazaq handyǵynyń 550 jyldyq mereıtoıyna baılanysty jumystar saıabyrsyp qaldy. Biraq bıylǵa taǵy da 142 mln. teńge qarastyryldy. Jol jóndeý jumystary tolyq aıaqtalady.
Qojaıhan Bıjanov,
T. Rysqulov aýdanynyń turǵyny:
– Aýdanymyzdaǵy eldi mekenderge gaz qubyry tartylyp, halyq qýanyp jatyr. Biraq keıbir eldi mekenderde gaz qysymy tómen.
– Bul máseleden habardarmyn. Aldaǵy ýaqytta T. Rysqulov aýdanyndaǵy Aqyrtóbe eldi mekeninen úlken gaz torabyn salýǵa 484 mln. teńge qarastyryldy. Osy nysannyń qurylysy bitse, gaz qysymy kóbeıedi.
Abdolla Baqbergenov,
Taraz qalasynyń turǵyny:
– Bul máseleni byltyr da aıtqan bolatynmyn. Biraq eshqandaı nátıje joq. Taraz qalasynda «qyzyl syzyqqa» shyǵyp ketken jaıma bazarlar áli kúnge joıylǵan joq. «Aýyl bereke» bazarynda sanıtarııa máselesi tipten talapqa saı kelmeıdi.
– Taraz qalasyndaǵy Tashkent kóshesiniń boıynda jaıma bazarlardyń kóbeıip ketkeni ras edi. Qazir kóbisi jabyldy. Biraq áli de beı-bereketsizdik bar. Sondyqtan Taraz qalasynyń ákimine komıssııa quryp, «qyzyl syzyqqa» shyǵyp ketken jáne álgi «Aýyl bereke» bazaryndaǵy jaǵdaıdy tekserýge tapsyrma beremin.
Serik Qalyqov,
Shý qalasynyń turǵyny:
– Shý qalasyndaǵy lokomotıv jóndeý zaýytynda búginde 808 adam jumys isteıdi. Biraq qarjylyq qıyndyqqa baılanysty solardyń 519-y jalaqylarynyń jartysyn ǵana alyp júr. О́ıtkeni, tapsyrys az. Osy zaýyttyń jumysynyń alǵa basýyna qolushyn sozsańyz…
– Mamandyǵym – temirjolshy bolǵandyqtan bul zaýyttyń jumysymen jaqsy tanyspyn. Jambyl oblysyndaǵy «Qazfosfat», Hantaý, Myńaral sement zaýyttarynda júk tasıtyn qanshama vagondar bar. Biraq olar bul vagondardy basqa oblystarǵa aparyp jóndetip jatady. Sondyqtan aldaǵy ýaqytta bul vagondardyń jóndeýin Shýdaǵy zaýytta jasaýǵa kúsh salý kerek. Bul máseleni nazarda ustaımyn.
Mine, esepti jıynda jergilikti turǵyndar máselelerin ashyq aıtyp jatty. Menińshe elimizdiń saıası-ekonomıkalyq jetistikterinen bólek, biz nazar aýdara bermeıtin bir másele bar. Ol – qoǵamnyń ózgergeni. Jańa urpaqtyń erjetkeni. Sananyń ózgergeni. Bul – táýelsizdik jyldarynyń eń úlken jemisi. Jáne bul ashyqtyq pen jańashyldyq eldiń damýyna týra jol bastaıtyny taǵy anyq.
Oralhan DÁÝIT,
«Egemen Qazaqstan».
Jambyl oblysy.