Jazýshy Nurǵalı Orazdyń bir áńgimesinde esik aldyna qada qaǵyp, oǵan qol jýǵysh ornatylǵandyǵy aıtylady. Bastapqyda baıqamaǵan. Keler jyly qońyr kúzde qol jýý qıynǵa aınalǵan soń tańǵalyp qarasa sazdaýyt jerge shanshyǵan qada tamyrlap ósip, bıiktep ketken eken.
Nurǵalı Oraz sol shybyqty teris shanshysań da óspeı qoımaıtyn Qazyǵurt aýdanynyń týmasy. Qysy-jazy túsin bermeıtin, ar jaǵy máńgi qar jamylǵan Alataýǵa ulasatyn Saıram-О́gemdeı ertegideı jerde búginde Amerıkanyń Kalıfornııa shtatynda ósetin «chandler» jańǵaǵy ósiriletin bolady.
Osyndaı jaqsy bastamaǵa muryndyq bolǵan «Shymkent» ÁÁK UQ» aksıonerlik qoǵamy «Qarqyndy baq» agroaımaq jobasy boıynsha alma jáne jańǵaq baǵyn ósirýdi qolǵa aldy. Bul jobaǵa «Bazıs» holdıng kompanııasy qyzyǵýshylyq tanytyp, qarjy salmaq nıette.
Aýmaǵy bir myń gektarǵa deıin sozylatyn alma jáne jańǵaq alqaby Qarjan taýynyń eteginde qanat jaımaq.
Grek jańǵaǵyna tapshylyq Eýropanyń ózinde 180 myń tonnadan asady eken. Osyndaı jaǵdaıda qazaqstandyq jańǵaqtyń ótimdiligi qandaı bolatyndyǵyn shotqa sala berińiz.
Oblys ákimdigi amerıkalyq jańǵaqtan osylaısha úmit kútip otyr.
Baqtııar TAIJAN,
«Egemen Qazaqstan».
Ońtústik Qazaqstan
oblysy.