Tań sibirlep atyp, onyń aq samaladaı jaryǵy molaıa túsken kezde Oral stansasyna «Máńgilik El» áleýmettik poıyzy kelip toqtady. Kóktemniń alǵashqy kúnderinen bastalǵan maı tońǵysyz jylylyq poıyz shtaby músheleriniń de, olardy qarsy alýshylardyń da kóńilderin kókke kótere túskendeı edi.
Aldyńǵy kúnderi Oral óńiriniń qalasy men dalasyndaǵy turǵyndardy dirdektetip jibere jazdaǵan ókpek jel de sap tyıylypty. «Aqjaıyqqa qosh keldińizder!» – dedi jalpyrespýblıkalyq aksııaǵa qatysýshylardy jyly júzben qarsy alǵan úlken toptyń kóshbasshysy, Batys Qazaqstan oblysy ákiminiń orynbasary Baqtııar Máken.
Temirjol vokzalynyń perronynda sol sátte bastalyp ketken mıtıngte «Máńgilik El» áleýmettik poıyzy shtabynyń basshysy Ámirjan Álpeıisov sóz alyp, alda turǵan maqsattar jóninde jan-jaqty aıtyp berdi. Bizdiń basty mindetimiz de, basty paryzymyz da keń-baıtaq elimizdiń túkpir-túkpirindegi áleýmettiń jaı-kúıimen tanysý. Qysylǵanǵa qolushyn berý. О́mirdiń san-alýan tolǵaǵy jetken máselelerine qatysty shtab músheleri ortaǵa tastaıtyn paıdaly keńester de eshkimdi beı-jaı, selsoq qaldyra almaıtynyna kúmánimiz joq. Basy aýyryp, baltyry syzdaǵanǵa da áleýmettik poıyz quramyndaǵy Densaýlyq saqtaý jáne áleýmettik damý mınıstrligi mamandarynyń beretin kómegi ázir, dedi ol.
Kóp keshikpeı áleýmettik poıyz quramyndaǵy ártúrli sala ókilderi birneshe topqa bólinip, óz qyzmetterine kirisip te ketti. Osynaý aýqymdy, alymdy da shalymdy, súıekti de salmaqty, mándi de mańyzdy jalpyhalyqtyq shyraıly shara Qazaqstannyń Azamattyq alıansynyń bastamashy ári uıytqy bolýymen búkil el-jurtqa shapaǵatyn tıgizýde. Búginde respýblıkadaǵy úkimettik emes uıymdardyń qyzmetinde jańasha bir serpilis paıda bolǵanyn eshkim joqqa shyǵara almaıdy. Olardyń únderi de aıqyn, isteri de izgilikti bola bastady. Azamattyq qoǵam ınstıtýty – tutastaı memleketimizdiń úılesimdi túrde damýyna septigin tıgize alatyn teńdesi joq qurylym. Osy múmkindikti tıimdi túrde paıdalansaq kóp nárseden uta alamyz, dedi «Máńgilik El» áleýmettik poıyzy quramy múshelerimen kezdesý sátinde Batys Qazaqstan oblystyq Azamattyq alıansy qaýymdastyǵynyń tóraıymy Álııa Sálıeva. Bul pikir «Qazaqstannyń Azamattyq alıansy» ZTB dırektory Ildar Katenov tarapynan da qoldaý tapty.
Jastar – erkin eldiń erteńi. Bıylǵy táýelsizdiktiń shırek ǵasyrlyq mereıli merekesi jyly sol jyly dúnıege kelgen sábıler baıaǵy babalarymyz qaıran, jıyrma bes, qaıran jastyq dep kúrsinetin, kúrsine otyryp, jigerlenetin jasqa jetip otyr. Sondyqtan da bolsa kerek «Máńgilik El» áleýmettik poıyzy shtabynyń beldi de bilikti sarapshylary, sonyń ishinde QR Bilim jáne ǵylym mınıstrliginiń Maqsat Májıtov, Ardaq Begatarov, Almas Jumabekov syndy bas sarapshylary óńir jastarymen kezdesip, emen-jarqyn pikir almasty. Bul únqosý eki jaqqa da paıdaly bolǵanyn baıqadyq.
Al Batys Qazaqstan oblystyq jastar resýrsy ortalyǵynyń basshysy Kenesary Nurshınov pen poıyz quramyndaǵy sarapshylar arasynda bolǵan áńgime de jaqsy jelisin tapty. Atap aıtqanda, atalǵan ortalyqtyń bastamasymen táýelsizdiktiń jıyrma bes jyldyq merekesi qurmetine jyl aıaǵyna deıin «100 naqty kómek» keshendi is-sharasy uıymdastyrylyp otyr eken. Bul memlekettik deńgeıde iske asyrylyp jatqan «100 naqty qadamnyń» kishkene bir bólshegindeı áser qaldyrdy. Iаǵnı, osy atalǵan «100 naqty kómek» aıasynda jastardy qoǵamdyq ómirge beıimdeý, mamandyqtaryn durys tańdap, durys meńgerý, jumysqa ornalastyrý, baspanaǵa qol jetkizýge qajetti alǵysharttar jasaý sekildi san alýan kómekter túri kórsetilmek.
Qaısybirin aıtarsyń, aıta berse, tize berse, «Máńgilik El» áleýmettik poıyzy quramy músheleriniń oblystyń el-jurtyna, Aqjaıyqtyń qyry men oıyna tıgizip ketken shapaǵatyna eshqandaı baǵa jetpeıdi. Eshqandaı sóz jetpeıdi. Onyń basty mıssııasy joǵaryda poıyz shtabynyń basshysy Ámirjan Álpeıisov atap ótkendeı, izgilik, naqty turǵyndarǵa – naqty kómek, qaıyrymdylyq, qamqorlyq, aıaly alaqan jylýy, dedi jaıdary júzben I toptaǵy múgedek, Oral qalasynyń turǵyny Beısenbaı Aıdynǵalıev ortoped maman Naǵmet Mursalovtyń qabyldaýynan keıin.
Onyń osy pikiri áleýmettik poıyz saparynyń basty mánin ashyp berdi dep aıtýǵa tolyq negiz bar.
Temir QUSAIYN,
«Egemen Qazaqstan».
ORAL.