Mánerlep syrǵanaý qazaq perzenti úshin sporttyń áý bastan kenjelep qalǵan bir túri edi. Bizdiń bilýimizde, saıystyń bul salasynda budan biraz jyldar buryn Aıgúl Qýanysheva, Quralaı Tilebaldınova degen qyzdarymyz boldy. Biraq olar sport sheberi dárejesine jetip, birneshe ret respýblıka chempıony atanǵannan árige asa almady. Bul qatyp turǵan seńniń kóbesin alǵash Denıs Ten buzdy. 2013 jyly alǵash ret álem chempıonatynda kúmis medalǵa qol jetkizgen ol 2014 jyly Sochı Olımpıadasynda jáne 2015 jyly jahan jarysynda qola medaldyń ıegeri atandy. Mine, tap osy shamada qazaq qyzy Elızabet Tursynbaeva da mánerlep syrǵanaýshy jasóspirimderdiń alaman báıgelerinen jarqyrap kórine bastady.
Buǵan deıin otbasy bolyp Máskeýde turyp, jattyǵyp kelgen Lıza tap osy 2013 jyly ustazdaryn almastyryp, ata-anasymen birge Kanadaǵa qonys aýdardy. Osydan bastap jergilikti bapker Braıan Orserdiń qaraýynda jattyǵýǵa kiristi. Al jas qyzdyń bulaısha aıaq astynan túp kóterilip, áke-sheshesin sońyna ertip, muhıt asyp ketýine negizgi sebep bolǵan onyń týǵan eli – Qazaqstannyń namysyn qorǵaý nıetinen qaıtpaýy edi. Ras, Lıza Máskeýde dúnıege kelip, bala jasynan sonda ósken. Mánerlep syrǵanaýdyń da alǵashqy álippesin osy qalada alǵan. Osynda Aleksandr Shýbınnen qanat qaqqan ol keıin taǵy úsh jattyqtyrýshynyń mektebinen ótip, úlken úmit kúttiretin jas býynnyń qatarynan oryn alǵan.
Bir tań qalatynyń, qyzdarynyń osy salaǵa birjola túskenine kózderi jetkennen keıin onyń ákesi Baıtaq pen anasy Padıshahan ózderiniń barlyq tirshilikterin sonyń jolyna arnaıdy. Qyzylorda oblysynyń Aral qalasynda týyp-ósken Baıtaq 1992 jyly QarMÝ-di bitirgennen keıin Máskeý qalasyna issaparmen kelip, sońynan kásipkerlik salaǵa bet buryp, osynda birjola qalyp qoıady. Bul kezde sol bıznesi jap-jaqsy tabys berip turǵan is adamy tapqan-taıanǵandarynyń biraz bóligin qyzynyń sportpen alańsyz aınalysýyna, jaqsy júrip-turýyna jumsaýǵa kóshedi.
Elızabet básireli básekelerge Úıeńki japyraǵy eline kelgennen keıin ǵana qosyla bastady. Ol 2014 jyly alǵash ret jasóspirimder arasyndaǵy álem chempıonatyna qatysyp, qorytyndy esepte 11-orynǵa taban tiredi. Osy jyly jas sportshy Sochı Olımpııalyq oıyndarynyń kórsetilim synaǵyna qatysý baqytyna da ıe boldy. Al 2015 jyly Tallınde ótken kelesi álemdik jarysta júldeli oryndarǵa qarys qadam ǵana jetpeı, 4-orynǵa tuıaq iliktirdi.
Bıylǵy jyl da Elızabet úshin jaqsy bastalyp otyr. Ol aqpan aıynyń basynda Norvegııada jalaý jelbiretken jasóspirimderdiń Olımpııalyq oıyndarynda baǵyn synady. Qysqa baǵdarlama boıynsha ekinshi orynǵa aıaq artqan mánerlep syrǵanaýshy erkin baǵdarlamanyń nátıjesi negizinde qola medalmen týrnırdi aıaqtady. Bıylǵy jylǵy 14 aqpan kúni jasy 16-ǵa tolǵan Elızabettiń úlken sporttaǵy jeter jetistikteri men alar asýlary alda. Qazaq mánerlep syrǵanaý sportynyń beleńge bitken báısheshegi ispettes talantty qyzdyń bolashaǵynan bárimiz de úlken úmit kútemiz.
Rýslan IGILIK.