ASTANA. 6 naýryz. VTB Biryńǵaı lıgasynda el namysyn qorǵaıtyn «Astana» basketbol komandasy Belarýs astanasy – Mınsk qalasynda jergilikti «Smokı-Mınskpen» kezdesip, 83:87 esebimen jeńildi. Bul týraly egemen.kz tilshisi habarlady.
Oıyndy qos komanda da óte belsendi bastady. Alań ıeleri negizinen alystan laqtyrý ádisin qoldansa, astanalyqtar kóbine eki upaılyq laqtyrystarǵa ıek artty. Nátıjesinde birinshi kezeńde bizdiń jigitter 19:17 esebimen basym tústi.
Esesine, ekinshi kezeńde belorýstar basymdyqty óz qoldaryna alyp, birneshe nátıjeli shabýyl uıymdastyrdy. Sonyń arqasynda úlken úziliske «Smokı-Mınsk» jalpy esep boıynsha jeńimpaz retinde attandy (41:34).
Úshinshi kezeńde oıyn órnegi teń jaǵdaıda órbip, qos komanda 26 upaıdan jınaldy. Al sońǵy kezeń «Astananyń» paıdasyna 23:20 esebimen aıaqtaldy. Alaıda, ekinshi kezeńdegi basymdyq óz jemisin berip, mınskilikter jalpy esepte jeńiske jetti.
Match barysynda «Astana» sapynan Kennet Heıs eń nátıjeli oıynshy atandy. Ol 40 mınýtta 24 upaı jınaǵan bolatyn. Endi Ramýnas Býtaýtastyń shákirtteri kelesi kezdesýlerin 13 naýryzda óz alańynda Chehııanyń «Nımbýrk» komandasymen ótkizedi. Atalǵan oıyn Qaraǵandy qalasyndaǵy «Jastar» sport kesheninde oınalatynyn atap ótken jón.
Búginde VTB Biryńǵaı lıgasynyń týrnır kestesinde «Astana» 16 komandanyń ishinde 15-orynda tur. Sondaı-aq, elordalyqtar osymen qatarynan altynshy ret jeńilip otyrǵanyn aıta keteıik.
Elaman Qońyr.
Derek: egemen.kz.
Sýret: bcastana.kz.