«Damý» kásipkerlikti damytý qory» AQ-tyń oblystyq bólimshesi jergilikti shaǵyn jáne orta bıznes sýbektilerine júıeli demeýqarjylyq qoldaý kórsetip keledi. Máselen, «Bıznestiń jol kartasy-2020» baǵdarlamasy iske asyrylǵannan beri bes júzge jýyq joba ıgerilgen. Olarǵa jumsalǵan qarjy mólsheri 47 mıllıard teńgeni quraıdy.
Bólimshe dırektory Mereke Syzdyqovtyń aıtýynsha, sońǵy tórt jyl aralyǵynda kásipkerler 3 mıllıard teńge nesıeni jaratqan. Agroónerkásip kesheni, óńdeý, qaıta óńdeý, orman isi, balyq ósirý salalaryna basymdyq berilgen. Iri jobalardy júzege asyrýǵa belsendi atsalysqan qurylymdarǵa bıyl da úlken senim bildirilip otyr. Olardyń qataryna «DEZ», «Tatkraft-Invest», «Rım-KazAgro», «Ádil Qus» sekildi seriktestikterdi jatqyzýǵa bolady. Bularmen 70-ke tarta kelisimshart jasalyp, kepildik somasy 1 mıllıard teńgege jýyqtaǵan. Kásipkerliktiń álippesin jańa bastap, qyr-syryn endi ıgergen jandar da nazardan tys qalmaıdy. Olar semınarlarda bilimderin jetildirip, arnaıy nusqaýlyqtar alady.
Byltyr demeýqarjylandyrý boıynsha 10 mıllıard teńgeniń 120 kelisimsharty jasalsa, bıyl «Bıznestiń jol kartasy-2020» baǵdarlamasyna qatysýshylardyń sanyn molaıtý basty baǵdar etilgen. Bul maqsat úshin 1,4 mıllıard teńge bólinip, shaǵyn jáne orta bıznesti aýyldyq jerlerde keńinen óristetý joldary qarastyrylǵan. Jyl basynan beri 700-ge jýyq adamǵa bir myńnan astam qyzmet túrleri kórsetilgenin eskersek, kásipkerlik kókjıeginiń keńeıe túseri esh kúmán týdyrmaıdy. Bul salaǵa jastar jaǵy erekshe qyzyǵýshylyq tanytýda. Tirkeýge alynǵan 124 jeke kásipkerliktiń basym bóligi jastarǵa tıesili. Aıyrtaý aýdanynda turatyn Vera Sýhova 2,5 mıllıon teńge kóleminde qaıtarymsyz grant alyp, óz isin dóńgeletip áketken. M. Qozybaev atyndaǵy Soltústik Qazaqstan memlekettik ýnıversıtettiń bastamashyl stýdentteri de «Damý» káispkerlikti damytý qory» AQ-tyń jergilikti fılıalymen yntymaqtastyq memorandýmyna qol qoıyp, jańashyldyqqa bet buryp otyr.
О́mir ESQALI,
«Egemen Qazaqstan».
Soltústik Qazaqstan oblysy.