Jańalyqqa jany qumar Qazbek

...Ol únemi birinshi bolýǵa umtyldy. Mektepte sabaǵyn jaq­sy oqýmen qatar qoǵamdyq jumystardyń da bel ortasynan tabylatyn Qazbek eshkimge «bul qolymnan kelmeıdi nemese ýaqytym joq» dep kórmegen jan. Erinshektik, jalqaýlyq, ıakı búgingi atqarylar sharýany erteńge qaldyrý onyń tabıǵatyna múldem jat. Aqtóbe medısınalyq ınstıtýtynda oqyp júrgen kezderi árdaıym alǵa umtylýmen ustaz­darynyń da iltıpatyna bólengen stýdenttiń biri emes biregeıi bol­­ǵan Qazbek alǵashqy eńbek jolyn 1995 jyly Qyzylorda oblysynyń Shıeli aýdandyq aýrýhanasynda bastaıdy. Shamaly ýaqyttyń ishinde óz isine asa mu­­qııat, jaýapkershilik júgin jan-tánimen sezine biletin, talapty jas maman, reanımasııa bóliminiń dáriger anestezıolog-reanımatologyna áriptesteri úlken senim artyp, 1996 jyly Shıeli aýdandyq densaýlyq saqtaý qyzmetkerleri kásipodaq komıtetiniń tóraǵasy mindetin júkteıdi. «Dáriger eńbeginiń óteýi eń birinshi kezekte, syrqattyń saýyqqany, onyń tez arada ońal­ǵany ǵoı. Kez kelgen dáriger úshin odan artyq baǵa joq», deıdi áńgime barysynda bilikti maman Qazbek Sháýkebaev. «Aýrý adamǵa kórsetken kómegińniń, jasaǵan emińniń sátti bolyp shyqqanyn seziný ózińe degen senimdi arttyra túsetin, qosymsha qýat syılaıtyn adrenalın ispetti. Qoldanar emiń nátıjeli bolǵan saıyn dárigerlik tájirıbeń de ulǵaıa túspek. Mu­nyń bári aınalyp kelgende dári­gerdiń bedeliniń artýyna áser etetin, onyń aýrýdy aıaǵynan tik turǵyzǵansha tún uıqysyn tórt bólip, tynym tappaǵan eńbeginiń naqty nátıjesiniń oń kórinisi», deıdi ol. Ol medısına salasyndaǵy sońǵy jańalyqtardy der mez­gilinde ıgermeıinshe, syrqattarǵa sapaly qyzmet kórsetý joǵary deńgeıde bolmaıtynyn jete uǵynǵandyqtan, ózin-ózi je­til­­­dirý­men tynbaı jumys júr­gizýdi áste esten shyǵarǵan emes. Soǵan oraı 2000 jyly Al­ma­ty qalasynda kóshpeli oqý sık­ly «Dıagnostıka Oberon», me­dısınalyq menedjment ta­qy­­­ryby boıynsha bilimin je­tildirgen Qazbek Altynbekuly qosymsha jeke kásipti ıgerýdi qolǵa alyp, dıagnostıkalyq kabınet ashyp, zertteý jumystaryn júrgizýmen aınalysady. Dáriger retinde álemdik medısınadaǵy jylt etken jaǵymdy jańalyqty qalt jibermeı, únemi izdenistegi bilimdi de bilikti maman ár jyldary «Kenbasqarmasy №6» JAQ me­dıko-sanıtarlyq bólimi fılıalynyń bas dárigeri, «Ken basqarmasy №6» JShS me­dı­ko-sanıtarlyq bólimi fı­lıalynyń bas dárigeri, Qaz­atomónerkásip «Demeý-Shıeli» medıko-sanıtar­lyq bólimi fı­lıalynyń bas dárigeri qyzmet­terin atqarsa, qazirgi tańda Shıeli aýdandyq aýrýhanasynyń bas dárigeri. Sońǵy jyldary medısına salasyndaǵy reformalarǵa saı uıymdastyrý jumystaryn ońtaıly úılestire bilýimen árip­testeri arasynda erekshelengen mamannyń biri de Qazbek Sháý­kebaev boldy desek esh artyq aıtqandyq emes. Reformanyń ózin ýaqyt usynady dep esep­teıtin Qazbek Altynbekuly ın­no­vasııalyq tehnologııalardy qoldanysqa engizip, iske asyrý sol salanyń alǵa jyljýyna, istiń nátıjeli bolaryna birden bir sep dep biledi. «Medısına salasyndaǵy reformalar birtindep, kezegimen júıeli túrde iske asyrylýda. Árıne birden bárin ilip áketý ońaı emes. Qazirgi tańda elimiz­diń medısına salasynda qolǵa alyn­­­­ǵan reformalar kezinde órkenıetti elderde synnan ótken, synaqqa tótep bergen álemdik medısınna salasyndaǵy jumys isteýdiń yńǵaıly da ońtaıly ádis-tásilderi. Reformanyń ózi ýaqyt talabyna saı júzege asatyn ıgilikti istiń biri. Onyń tıim­diligi de óz nátıjesin berýde. Mysaly, bir kezderi otan­dastarymyz kúrdeli otany iri qalalarǵa baryp jasatatyn bolsa, al qazirgi tańda kúrdeli otalar tek oblys ortalyqtarynda ǵana emes, sondaı-aq, sońǵy úlgidegi medısınalyq qurylǵylarmen jaraqtandyrylǵan Shıeli aý­dandyq aýrýhanasy syndy em­deý oryndarynda da jasalatyn boldy», degen Qazbek Altynbekuly búgingi otandyq medısınadaǵy jańalyqtarǵa qatysty oıymen de bólisti. «Bizdiń aýrýha­nada birinshi medısınalyq kómek kórsetý óte jaqsy jolǵa qoıylǵan. Aýyr syrqattar túsken kezde telemedısına arqyly oblystaǵy mamandarmen baılanysqa shyǵyp, habarlasyp, syrqatqa qajetti kó­­mekti der mezgilinde alýǵa múm­­kindik bar. Mamandar qarap, keńes beredi. Munyń bári me­dısı­nadaǵy reformalardyń, ınnovasııalyq tehnologııalardyń oń nátıjesin bergeniniń naqty dáleli bolsa kerek», deıdi ol. Qazbek – istiń adamy. Kóp­sózdilikti unatpaıdy. Áriptesi Sáýlet Ráshbaıulynyń aıtýynsha, aýrýhanaǵa alynǵan jańa tehnologııalardy dárigerler qalaı paıdalanyp jatyr, ony tıimdi qoldanýdyń ádis-tásilderin jetik meńgere aldy ma, mine, máseleniń osy jaǵyna aıryqsha mán bere­tin basshy óz mamandarynyń da biliktiligin jetildirýin qatań talap etedi eken. – Basqa aýrýhanalardy kó­rip, salystyryp, sońǵy jańa­lyq­tardy qabyldaýǵa umtylatyn Qazbek Altynbekuly ózi basshy­lyq jasaıtyn emdeý ornyn joǵary deńgeıde ustaýǵa tyrysady. Sonyń nátıjesinde sońǵy jyldary Shıeli aýdandyq aýrýhanasynda ota jasaýdyń kóbi apparatpen, ıakı laporoskopııa­lyq ádispen jasalýda. Bul ádisti oblys kóleminde birinshi bolyp engizgen de jaqsy jańalyqqa ja­ny qumar, bilikti dáriger Qaz­­­­­bek Altynbekuly», – deıdi Sáýlet Ráshbaıuly. Gúlzeınep SÁDIRQYZY, «Egemen Qazaqstan». Sala qyzmetkerleri arasynda «2015 jyldyń úzdik jetekshisi» atanǵan ol mundaı qurmetke erin­beı etken eńbek pen tynymsyz izde­nisiniń arqasynda jetkeni anyq. Qyzylorda oblysy.