Almaty – О́skemen tas jolynyń boıynda Úshbıik atty aýyl bar. Shyǵys óńiriniń Jarma aýdanyna qarasty alaqandaı aýyldyń etek-jeńi jınaqy, tirshiligi baqýatty. Qasıetti Qalba jotasynda, toǵyz joldyń torabynda ornalasqan eldi mekenniń tizginin ustaýǵa eki jyl buryn Perızat Oralbaeva esimdi qarshadaı qyz kelgen-di. Aıagóz aýdanynyń týmasy eńbek jolyn mamandyǵy boıynsha týǵan jerinde bastady. Jer qatynastary máselesinde tájirıbe jınaqtaǵan jas kóp uzamaı aýdandaǵy strategııalyq eldi mekenderdiń biri, shoıyn joldyń boıyndaǵy Aqtoǵaı kenti ákiminiń orynbasary boldy. Búginde Aqtoǵaıda iri mys kenishi ıgerilip jatyr. Osyndaı óndiris ornymen óńirdiń ekonomıkalyq kúretamyryna aınalǵan kenttegi qyzmetinde biraz ysylǵan soń gazette jarııalanǵan baıqaý arqyly qazirgi jumysyna kelgen eken.
– Merzimdi basylymnan Úshbıik aýyldyq okrýgi ákiminiń laýazymyna jarııalanǵan baıqaýdy oqyǵan soń, baǵymdy synap kórmekke Jarma aýdanynyń máslıhatyna qujat tapsyrdym. Taǵy eki adam úmitker boldy. Depýtattar meniń baǵdarlamama qoldaý kórsetip, aýyl ákimderin saılaý negizinde osy qyzmetke taǵaıyndaldym. Bul – Elbasymyz Nursultan Nazarbaevtyń elimizdegi genderlik saıasatty jolǵa qoıý jáne jas kóshbasshylarǵa qoldaý kórsetý jónindegi saıasatynyń jemisi dep oılaımyn, – dep bastady aýyl ákimi áńgimesin.
Shynynda, eki jyl buryn óńirge jumys saparymen kelgen Memlekettik hatshy Gúlshara Ábdiqalyqovamen ótken kezdesýde 28 jastaǵy Perızat Erbolatqyzy elimizdegi eń jas ákim retinde tanystyrylǵany esimizde.
«Aýyldy kóterý – Qazaqstandy kóterý» dep sanaıtyn áıel ákim keńsede emes, el arasynda, sharýashylyq basynda júrgende is ónetinin aıtady. Árıne, jas qyz bastapqyda bul jumysty alyp kete alatynyna ózi de ılanbapty. Aýyl turǵyndary arasynda da senimsizdikpen qaraýshylar bolmaı qalǵan joq. Biraq, «kóz – qorqaq, qol – batyr», «jas kelse – iske!» degen. Bıyl keńshar retinde qurylǵanyna 55 jyl tolyp otyrǵan aýyl halqynyń qoldaýynyń arqasynda jas ákimniń jumysy birtindep alǵa basyp keledi. Qazir Úshbıik aýyldyq okrýginde aqsaqaldar alqasy, analar keńesi, jastar uıymy jumys isteıdi.
Taýly aımaqta ornalasqandyqtan, mal sharýashylyǵyn damytýǵa beıimdelgen aýyldyq okrýgke Úshbıik, Janama jáne Eńirekeı eldi mekenderi enedi. 3 myńnan asa iri qara, 2 myńnan astam jylqy, 35 myń qoı-eshki ósirip otyr. Respýblıkaǵa asyl tuqymdy «Baıys» qoıyn ósirýmen tanylǵan bul okrýgte 52 sharýa qojalyǵy, 2 asyl tuqymdy qoı zaýyty, mal bordaqylaý alańy men mal soıý pýnktteri bar. О́skemen, Semeı qalalary men Jarma jáne Aıagóz aýdandaryn kúnine 10-20 tonnaǵa deıin et ónimderimen qamtamasyz etedi. Bul – myń jarymǵa jýyq halqy bar Úshbıik úshin aýyz toltyryp aıtarlyqtaı jetistik.
Búginde kóptegen kórsetkishteri jaǵynan aýdanda aldyńǵy oryndarda kórinip kele jatqan aýylda «100 mektep, 100 aýrýhana» baǵdarlamasy sheńberinde jańadan salynǵan Aqtaılaq bı atyndaǵy orta mektep, dárigerlik ambýlatorııa bar. Sońǵy eki jylda Úshbıikke «Dıplommen – aýylǵa!» jobasy aıasynda tórt jas maman kelip, aýyldaǵy memlekettik qyzmetkerler qatary jastarmen tolyǵýda. Mektep dırektory Erzat Qanapııanov, ambýlatorııanyń bas dárigeri Gúlsana Sháripbekova, aýyldyq mádenıet úıiniń meńgerýshisi Beısengeldi Elemesov – 20 men 30 jas aralyǵyndaǵy jastar. Farıda Aqatqyzy da Semeıdegi medısınalyq ýnıversıtetti bitirgen soń atalǵan baǵdarlamamen aýylǵa kelgen jastardyń biri. Mádenıet úıinde ashylǵan kitaphana meńgerýshisi Sholpan Aıabaevanyń aıtýynsha, 6500 kitap qory men 600 turaqty oqyrman bar. Osylaısha, Úshbıik aýyly jalyndy jastardyń ordasyna aınaldy.
Dýman ANASh,
«Egemen Qazaqstan».
Shyǵys Qazaqstan oblysy,
Jarma aýdany,
Úshbıik aýyly.