ATYRAÝ. 16 naýryz. Atyraý qalalyq soty qorshaýsyz podstansanyń aýmaǵynda elektr toǵynan zardap shekken jasóspirimniń emdeý shyǵyndaryn energetıkterden óndirýge uıǵarym jasady. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady.
«Sotqa talap qoıýshy talap aryzben júginip, kámelet jasyna tolmaǵan balasynyń «Atyraý Jaryq» AQ qyzmetkerleriniń jaýapsyzdyǵynan toqqa soǵylyp, densaýlyǵyna zaqym kelgenin kórsetip, ózderiniń qyzmettik mindetterine nemquraıly qaraǵan «Atyraý Jaryq» AQ-nan materıaldyq shyǵyndy óndirýdi surady. О́ıtkeni, 2014 jyldyń 19 sáýirinde kámelet jasyna tolmaǵan uly qorshalmaǵan elektrlik podstansanyń aýmaǵynda elektr toǵyna soǵylyp, aýyr kúıikterimen aýrýhanaǵa jetkizilgen. Dárigerler balany aman alyp qalý úshin onyń eki qolyn birdeı kesýge májbúr boldy. Balanyń ata-anasyna qazirgi zamanǵy medısınalyq kómek kórsetý úshin Ystambul qalasyndaǵy (Túrkııa) MEDICAREINTERNATIONAL medısınalyq ortalyǵyna júginýge týra kelgen. Talap qoıýshy usynǵan dáleldemelerine sáıkes balany shetelde emdeý shyǵyny 142 600 AQSh dollaryn qurady. Sot istiń barlyq mán jáıyn zerdelep, jaýapker «Atyraý Jaryq» AQ-nan K.-nyń paıdasyna balany emdeýge jumsalǵan shyǵyn 17 549 703 tengeni óndirdi», – dep habarlady Atyraý oblystyq sotynyń baspasóz hatshysy Boranbaı Ǵalıev.
Sot sheshimi zańdy kúshine endi.
Joldasbek Shópeǵul.
Derek: Atyraý oblystyq sotynyń baspasóz qyzmeti.
Sýret: mng.adilet.gov.kz.