«Kókshetaý» mádenıet saraıynda Aqmola oblysy ákimdiginiń qoldaýymen oblystyq mádenıet basqarmasy, oblystyq halyq shyǵarmashylyǵy jáne mádenı demalys ortalyǵy Qazaqstan Respýblıkasy Táýelsizdiginiń 25 jyldyǵyna arnalǵan «Alǵys aıtam halqyma» atty aımaqtyq aqyndar aıtysyn ótkizdi.
Aqmola oblystyq mádenıet basqarmasynyń basshysy Sáýle Bóribaeva quttyqtaý sóz sóılep, aqyndarǵa sáttilik, jeńis tiledi. Aıtystyń basty maqsaty Aqmola óńirinde halqymyzdyń baǵa jetpes ulttyq óneri, mádenı murasy retinde sýyrypsalma aqyndyq ónerin keńinen damytý bolyp tabylady.
Aqmola oblysy talanttarǵa baı ólke. Aspandaǵy aqqýǵa únin qosqan Birjan sal, án padıshasy Aqan seri, darhan eliniń dańqyn asyrǵan áıgili Balýan sholaq, án kóginde «Gákkýimen» qalyqtaǵan Úkili Ybyraı syndy óner sańlaqtarynyń asyl murasyn jalǵastyrýshylardyń biri Qazaqstannyń halyq aqyny – Kóken Shákeev edi. Ol aıtys óneriniń Arqa óńirinde barynsha óris ashyp, qanat jaıýyna mol eńbek sińirdi, kóptegen shákirtterdi tárbıeledi. Solardyń ishinde aqyn, manasshy Baıanǵalı Álimjanov, aıtysker aqyn, dramatýrg Qudaıberli Myrzabek, respýblıkalyq, halyqaralyq aqyndar aıtysynyń jeńimpazy Arman Berdalındi atap aıtsa bolady. Búgingi kúni de jurtshylyq súıispenshiligine bólengen arqaly aıtyskerler barshylyq.
Dúrkirep ótken keshegi aıtys oblysymyzda osy kıeli ónerdiń órkeni bıiktigin baıqatty. Irikteý kezeńine oblysymyzdyń qala, aýdandarynan jáne Soltústik Qazaqstan oblysynan barlyǵy 18 aqyn qatysty. Ekinshi kezeńge solardyń ishinen 12 aqyn ótip, 6 jup bolyp aıtysty. Sahnaǵa birinshi bolyp kókshetaýlyq Muhamed Qonqaev pen soltústikqazaqstandyq Amanjol Zaǵypar shyqty. Kelesi kezekte Qýanysh Ospan (Kókshetaý q.) men Qurmet Quralhan (Arshaly aýdany), Baıron Máres (Ereımentaý) pen Máljanbaı Azamat (Selınograd aýdany), Nurtýǵan Serik (Eńbekshilder aýdany) pen Jarqyn Juparhan (SQO), Nurıslam Ábdil (Kókshetaý q.) men Ekpin Sábethan (Zerendi aýdany), Marǵulan Ospanov (Bulandy aýdany) pen Haıymhan Jansaıa (Aqan seri atyndaǵy mádenıet kolledji) ózara baq synasty.
Ekinshi kezeńniń qorytyndysy boıynsha joǵary upaı alǵan 6 aqyn, 3 jup aqtyq márege shyǵyp, sýyrypsalma sheberligimen kórermender yqylasyna bólendi. Aıtysta oraq tildi aqyndardyń biri júırik sheshendigimen, endi biri tereń oıly bilimdiligimen, utymdy alǵyr órnekterimen erekshelenip, óreli ónerimizdiń joǵary úlgisin tanytty.
Qazylar alqasynyń sheshimimen Nurıslam Ábdil (Kókshetaý q.) bas júldeni, Haıymhan Jansaıa (Kókshetaý q.) birinshi oryndy, al Marǵulan Ospanov (Bulandy aýdany) pen Qýanysh Ospan (Kókshetaý q.) ekinshi jáne úshinshi oryndardy ıelendi. Sondaı-aq, aıtysqa qatysqan barlyq aqyndar dıplomdarmen jáne aqshalaı syılyqpen marapattaldy.
Aıtys óneri – búgingi rýhanı mádenıetimizdiń ajyramas bir bóligi. Bul óner – urpaqtan-urpaqqa, býynnan-býynǵa aýysyp, órisi keńip, damı beretini anyq. Oǵan qalanyp jatqan negiz de joq emes. Máselen, kelesi jolǵy aıtystyń Ereımentaý aýdanynda ótetindigi jóninde sheshimniń qabyldanýy sózimizge dálel boldy. Buǵan qosa, óńirdiń qala, aýdandarynda turaqty jumys isteıtin aıtysker aqyndar mektepterin ashý da josparlanǵan.
Baqbergen AMALBEK,
«Egemen Qazaqstan».
Aqmola oblysy.