«Senim joq jerde – adamgershilik joq, senim bar jerde – kúmán joq» demekshi, halqyna, eline, Elbasyna, onyń salıqaly saıasatyna senimmen qarap, nyq qadam basyp, óziniń ómirlik kózqarasymen, tájirıbesimen, adaldyǵymen jastarǵa ónege bolyp, qoǵamda óz ornyn taýyp júrgen azamattar qanshama deseńizshi. Sonyń biregeıi qatarynda Astrahan aýdany ortalyq emhanasynyń 35 jyl bas dárigeri bolyp, halqyna aıanbaı eńbek etken ardager ustazymyz, búginde ÝZI dárigeri Nurmuhambet Aıtqojynuly Sembaevty qurmetpen atar edik.
Aǵamyz 1975 jyly Qaraǵandy medısına ınstıtýtyn oıdaǵydaı aıaqtap, dáriger-balalar hırýrgy mamandyǵyn aldy. Aýdandyq aýrýhanada qyzmet istedi. Araǵa jyl salmaı bilimdi de bilikti mamanǵa senim artylyp, kindik qany tamǵan Jaltyr aýyldyq emhanasyna bas dáriger etip taǵaıyndaldy. Munda da ol uıymdastyrýshylyq qyrynan aýdan kóleminde abyroı tuǵyrynan kórine bildi. Úsh jyldyq eńbek nátıjesi retinde balalar óliminiń kúrt tómendeýin, ana óliminiń tirkelmeýin aıtar edik. Áleýmettik keseldikter onkologııa, júrek talmasy, qant aýrýy kórsetkishteriniń jaqsarýy baıqaldy. Osydan bolsa kerek, oblystyq densaýlyq saqtaý basqarmasy Nurmuhambet Aıtqojynulynyń eńbegin baǵalap, 1980 jyly aýdandyq ortalyq emhanaǵa bas dáriger etip taǵaıyndady.
Asyl azamat, bilikti basshy óz kásibine árdaıym adal bolyp, kópshiliktiń alǵys-qurmetin enshiledi. Qoǵamdyq jumystarǵa da belsene qatysty. Nurmuhambet aǵa 1980 jyldan bastap 2015 jylǵa deıin aýdandyq máslıhattyń depýtaty, sondaı-aq, oblystyq máslıhattyń birneshe shaqyrylymynyń depýtaty boldy.
– Egemendik jyldary Elbasynyń áleýmettik salaǵa erekshe kóńil bólýi medısına salasynyń qulashtaı damýyna septigin tıgizdi, – deıdi aǵamyz. – Máselen, emhana 2010 jyly sýdaı taza reanımobıl avtokóligin 25 mıllıon teńgege, ıtalııalyq «Apollo» rentgen apparatyn, 12 mıllıonǵa jańa mammograf, sıfrlyq flıýorograf, «KamAZ» kóligine qondyrylǵan jyljymaly flıýoroapparatty satyp alýǵa múmkindik týdy. Jalpy, Aqmola oblysy óńirinde medısına salasynyń qurylystary bir sát te báseńsigen emes. Oblystyq densaýlyq saqtaý basqarmasy tizginin ustaǵan medısına ǵylymdarynyń kandıdaty Gúlnár Qulyshevanyń basshylyǵymen búginde qyrýar jumystar atqarylýda. Dárigerlerge myńdaǵan adamnyń ómiri senip tapsyrylǵandyqtan, bosańsýǵa esh haqymyz joq.
Tirshilik kedir-budyr qıynshylyqtardan da turatyny belgili. Mundaı jaǵdaıda Nurekemiz eldiń arqa súıer azamaty retinde, kópshilikti aqyl men sabyrǵa shaqyryp, tyǵyryqtan shyǵýdyń ońtaıly joldaryn taba bildi. Bas dárigerlik qyzmeti jyldary óziniń myqty menedjer ekenin de kórsetti. Aýrýhanamyz oblys pen respýblıkadaǵy ozattar sapynan túsip kórgen emes.
Aǵamyz Densaýlyq saqtaý mınıstrliginiń «Qurmet» gramotasymen, eki ret «Densaýlyq saqtaý salasynyń úzdigi» belgisimen, «Eren eńbegi úshin» medalimen marapattaldy. Bul marapat ekiniń birine berilmeıtini aqıqat. Otan aldynda memlekettik qurylysqa, ekonomıkanyń qarqyndy damýyna qosqan úlesi respýblıkanyń halyqaralyq deńgeıde abyroıynyń artýyna, eńbektegi bıik jetistikterine, joǵary qoǵamdyq qyzmetine beriletin marapat.
Bul kisiniń ómirlik joldasy, balalarynyń anasy, asyl da altyn nemereleriniń ájesi Sholpan Amanjolqyzy osy emhanada 37 jyl dáriger-kardıolog, terapııa bóliminiń meńgerýshisi bolyp, halqyna adal eńbek etti.
Adamgershilik, adaldyq rýhynda tárbıelengen perzentteri: uly Saıat bedeldi zańger, qyzy Lázzat áke-sheshe jolyn qýyp joǵary sanatty dáriger-kardıolog retinde el syılysy. Bizdiń qazaq balasyn balym, nemeresin janym deıdi. Aǵamyz ben jeńgemiz 6 nemere súıip otyr.
Muhtar NURÁLIEV,
dáriger.
Aqmola oblysy,
Astrahan aýdany.