QOSTANAI. 17 naýryz. Jańa jyldan beri Qostanaı kóshelerinde 1367 adam jaraqat alǵan. Olardyń teń jartysy qart adamdar eken. Bul týraly alau.kz saıtyna silteme jasaǵan egemen.kz tilshisi habarlady.
Bıyl qansha kóktaıǵaq bolsa da, jaraqat alǵandardyń sany ótken jyldyń osy merzimimen salystyrǵanda 241-ge kem eken.
Qostanaı qalalyq aýrýhanasynyń bas dárigeri Samat Shúmenbaev: «Jaraqat alyp kelgenderdiń kópshiliginiń qol-aıaǵy, qabyrǵasy synǵan, ıyǵy shyǵyp ketken, tobyǵy taıǵan, jambasynyń urshyǵy synǵan», – dedi. Biraq bas dárigerdiń aıtýynsha, jaraqattar kósheden alǵan, turmystyq, óndiristik jáne jol-kólik apatynan bolǵan dep bólinedi. Demek barlyǵy birdeı kóktaıǵaqtan bolmaǵan.
Aýa raıyn boljaýshylar Qostanaıda jaqyn kúnderi taǵy da kóktaıǵaqtyń kúsheıetinin aıtyp otyr.
Názıra Járimbetova.
Derek, sýret: alau.kz.