AQTО́BE. 18 naýryz. Naýryz meıramy qarsańyńda Aqtóbe qalalyq ákimdiginiń ǵımaratynda «Qoljetimdi baspana» memlekettik baǵdarlamasynyń «Qazaqstan ıpotekalyq kompanııasy» ıpotekalyq uıymy» aksıonerlik qoǵamy turǵyn úıi baǵyty boıynsha páter kiltterin tabystaý saltanaty boldy. Bul týraly egemen.kz tilshisi habarlady.
Qala ákimi Bekbol Saǵyn merekelik sharaǵa qatysýshylardy kele jatqan Ulystyń Uly kúnimen quttyqtap, jergilikti atqarýshy organda kezekte turǵan 17 azamatqa №12 shaǵyn aýdandaǵy «Kendala» jáne №41 razezdegi «Altyn dala» turǵyn úı keshenderinen sý jańa páterlerdiń kiltterin tabystady.
Jaldamaly páterler kezekte turǵan bıýdjettik jáne memlekettik qyzmetkerlerge, tolyq emes, kóp balaly jáne múgedek balalary bar otbasylarǵa, jetim, ata-anasynyń qamqorlyǵynsyz qalǵan balalarǵa, áskerı qyzmetshilerge berildi.
«Qazirgi tańda ústimizdegi jylǵy 18 naýryzǵa deıin kezektegi azamattardan «Batys-1» shaǵyn aýdanyndaǵy 192 páterge jáne Lenıngradskaıa kóshesindegi 9 páterge elektrondyq nusqada qujattar qabyldanýda. Sonymen qatar, «Jas otbasylarǵa aranalǵan turǵyn úı» baǵdarlamasy boıynsha «Nur Aqtóbe» aýdanyndaǵy 234 páterge azamattardyń tólem qabiletterin tekserý boıynsha jumystar jalǵasýda», – dedi Bekbol Saǵyn.
Shahar basshysy atap ótkendeı, Aqtóbe qalasynda Memleket basshysynyń bastamalaryn júzege asyrý barysynda turǵyn úı qurylys baǵdarlamalary júzege asyrylyp, 2013 jyldan bastap búginge deıin 4 215 otbasy baspanaly bolǵan. Bıyl «Nur Aqtóbe» shaǵyn aýdanynda «Turǵynúıqurylysjınaq» júıesi boıynsha qurylysy ótken jyly bastalǵan 540 páterlik 10 blok-seksııaly 3 úı tapsyrylady dep kútilýde. Daǵdarysqa qarsy baǵdarlama aıasynda oblysymyzǵa qosymsha qarajat bólinetin boldy. «Nur Aqtóbe» turǵyn úı alabynyń №3 jáne №4 shaǵyn aýdandarynda jaldamaly turǵyn úılerdi salý qarastyrylǵan. Bıyl munda 1 728 páterlik 9 turǵyn úıdi salý josparlanýda.
Satybaldy Sáýirbaı.
Derek, sýret: egemen.kz.