Ýkraına parlamenti aqparattyq salada revolıýsııalyq retinde sanalatyn «Aqparattar týraly» jáne «Kópshilik aqparatqa qoljetimdilik týraly» zańdardy qabyldady.
Osy atalǵan zańdarǵa bılik ókilderi de, oppozısııadaǵy depýtattar da birdeı daýys bergen. Qujat senzýra degenniń ne ekenine anyqtama bere otyryp, ony qoldanýǵa tyıym salady, aqparattardy alý, olardy almasý, pikirler men senimderdi bildirý erkindigi quqylaryna kepildik beredi. Sol sııaqty adamdardy olardyń jeke bastary men otbasylyq ómirlerine aralasýdan qorǵaý da osy qujatta qarastyrylǵan. Sonymen birge qabyldanǵan zańdar jýrnalısterdiń kásibı qyzmetine aralasýǵa, aqparattardyń mazmunyna baqylaý jasaýǵa jáne jekelegen taqyryptardy jazýǵa tyıym salady.
Gýmanıtarlyq kómek jetkizilýde
Avstralııanyń sý tasqynynan zardap shekken Brısben qalasynyń halqyna azyq-túlik, sý, medıkamentter tárizdi alǵashqy gýmanıtarlyq kómek jetkizildi.
Toqtaýsyz jaýǵan nóser jaýynnyń saldarynan 25 myńnan astam birneshe kúnnen beri elektr jaryǵy, aýyz sý men azyq-túlik joq, jartylaı sý basqan úılerde qalýda, dep habarlady ITAR-TASS agenttigi. Brısbenniń lord-meri Kempbell Nıýmannyń aıtýynsha, birinshi kezekte qajetti zattardy jetkizip berýmen qorǵanys vedomstvosy men polısııa aınalysýda. Izdeý-qutqarý jumystaryna 1,2 myń áskerıler jumyldyrylǵan.
Sońǵy málimetter boıynsha qurban bolǵandar sany 15 adamǵa jetken, taǵy 51 adamnyń taǵdyry ázirge belgisiz kúıinde qalyp otyr.
Ushaq apaty úshin kim kináli?
Smolensk qalasynyń túbinde ótken jyldyń kókteminde bolǵan ushaq apaty úshin Polsha jaǵynyń jaýapty ekendigi aıdan-anyq dep esepteıdi osy eldiń burynǵy prezıdenti Leh Valensa.
Polshanyń qazirgi basshysy Bronıslav Komorovskıı de Halyqaralyq avıasııa komıtetiniń qorytyndylaryna esh kúmán keltirmeıdi. Taıaý ýaqyttarda el prezıdentiniń qaza tabýyna ákelip soqtyrǵan Smolensk túbindegi apattyń sebepteri men jaǵdaılaryna qatysty polshalyq nusqa da paıda bolmaq. Bul jóninde áýe apaty týraly HAK-tiń baıandamasyn tolyqqandy emes dep sanaıtyn Polsha premer-mınıstri Donald Týsk Varshavada ótken baspasóz máslıhatynda habarlady. Al tergeý qorytyndylary qaıǵyly oqıǵaǵa ushaq ekıpajy kináli dep taýyp otyr.
Internet materıaldary negizinde daıyndaldy.