Keshe Qazaqstan Respýblıkasynyń Memlekettik hatshysy G.Ábdiqalyqovanyń tóraǵalyǵymen Shetelde kadrlar daıarlaý jónindegi respýblıkalyq komıssııanyń alǵashqy otyrysy ótti.
Komıssııa otyrysyn ashqan Gúlshara Ábdiqalyqova Memleket basshysy N.Á.Nazarbaev «Qazaqstan jańa jahandyq naqty ahýalda: ósim, reformalar, damý» atty Joldaýynda Qazaqstan ekonomıkasyn ártaraptandyrý jáne ındýstrııalandyrý úshin daǵdarysqa qarsy jáne qurylymdyq qaıta qurýlardy iske asyrý boıynsha memlekettik mindetterdi oryndaýǵa qabiletti, joǵary bilikti mamandardy daıarlaý júıesin barynsha damytýdy tapsyrdy, dep atap kórsetti.
Memlekettik hatshy Ult Josparynda aıqyndalǵan mindetter boıynsha halyqaralyq deńgeıdegi otandyq kásipqoılar shoǵyryn qalyptastyrý úderisindegi stıpendııanyń rólin atap ótip, osyǵan oraı, aldaǵy ýaqytta konkýrstyq irikteý sapasyn jetildirý boıynsha birneshe is-sharalar ótkiziletinin tilge tıek etti.
Bıyldan bastap stıpendııa alýǵa úmitkerlerge qoıylatyn talaptar kúsheıtilgeni belgili. Dálirek aıtsaq, shet tilin bilý deńgeıine, dıplomynyń ortasha balyna, jumys ótiline qatysty birtalaı ózgerister engizilgen bolatyn. Sonymen qatar, 163 pozısııadan turatyn basym mamandyqtar tizbesi jańartyldy, onyń 41 paıyzy ınjenerlik-tehnıkalyq mamandardy daıarlaýǵa baǵyttalǵan.
Komıssııa otyrysynda «100 naqty qadam» – Ult Josparynyń jobalary úshin maqsatty tapsyrystar negizinde mamandardy daıarlaýǵa baǵyttalǵan taǵylymdama baǵdarlamasy boıynsha Qazaqstan Respýblıkasy Prezıdentiniń «Bolashaq» halyqaralyq stıpendııasynyń konkýrsyna qatysý úshin qyzmetkerler sanatynyń anyqtalǵanyn da aıta ketsek deımiz.
Otyrysty qorytyndylaı kele, Memlekettik hatshy Gúlshara Ábdiqalyqova «Bolashaq» halyqaralyq stıpendııasyn iske asyrý tetiginiń tıimdiligin odan ári jetildirý jáne arttyrý boıynsha birqatar tapsyrmalar berdi.
Raýan QAIDAR,
«Egemen Qazaqstan».