Saparda – «Salamatty Qazaqstan»

Qaraǵandy stansasynan «Salamatty Qazaqstan» poıyzy óziniń alǵashqy reısine – elimizdiń soltústik óńirindegi temirjol stansalarynyń turǵyndaryna medısınalyq kómek kórsetý úshin saparǵa attandy. Bul ıgi shara «Samuryq- Qazyna» AQ kompanııalar toby men «Samruk-Kazyna Trust» áleýmettik jobalar damytý qory qoldaýymen iske asyrylǵan. Jalpy, medısınalyq poıyzdar mamyrdan bastap tamyz aıyna deıingi aralyqta elimizdiń alystaǵy aýdan, shalǵaıdaǵy aýyl­darynda bolyp, bolat joldyń boıyndaǵy turǵyndarǵa tegin medısınalyq qyzmetter kórsetedi. Aýyl halqy bul aksııa barysynda 18 dárigerlik mamandyqtar boıynsha dıagnostıkalyq tekseristen ótedi. Poıyz zamanaýı dıa­g­nos­tı­ka­­lyq jáne emdeý jab­dyq­­­­tary, shaǵyn-operasııalyq bólme, ǵalamtor men telekommýnı­kasııa quraldaryna qosylǵan zert­hanamen jab­dyqtalǵan. Medı­sına­lyq brıgada quramynda joǵary bilikti dárigerler, terapevt, pedıatr, kóz dárigeri, qulaq-muryn, kómekeı aýrýlarynyń mamany, gıneko­log, hırýrg, ýrolog, mammolog, tis dárigeri bar. «Medısına poıyzy» jobasy aıasynda elimizdiń ár qıyryna «Salamatty Qazaqstan», «Járdem» jáne «Densaýlyq» dep atalǵan poıyzdar attanady. Mysaly, «Salamatty Qazaqstan» poıyzy 2016 jyldyń 10 mamyrynan 11 shildege deıin soltústik óńirdi aralasa, batys óńirinde «Járdem» poıyzy 23 mamyrdan 25 shildege deıin bolady. Al ońtústik aımaqta «Densaýlyq» poıyzy 10 maýsymnan 11 tamyzǵa deıin turǵyndarǵa medısınalyq qyzmet kórsetpek. Aıta ketetin jaıt, bul joba 2010 jyldan bastap júzege asyrylyp keledi. Aksııa aıasynda 2010 jyldan 2015 jylǵa deıin medısınalyq poıyz 900-den astam stansalardy qamtyp, 280 myńnan astam adamǵa medısınalyq bilikti kómek kórsetti. Jalpy alǵanda, temirjoldyń boıynda turatyn, úlken qalalarǵa baryp dárigerge kórinýge ýaqyty men qaltasy kótere bermeıtin halaıyq bul jobaǵa dán rıza. Qaırat ÁBILDINOV, «Egemen Qazaqstan» QARAǴANDY