Medbıke – dárigerdiń tolyqqandy seriktesi

Almatyda Ortalyq qalalyq qlınıkalyq aýrýhananyń konferens-zalynda qalalyq Densaýlyq saqtaý basqarmasynyń uıymdastyrýymen Halyqaralyq medbıkeler kúnine arnalǵan saltanatty is-shara ótti. Bıyl medbıke isiniń negizin salýshy anglııalyq medbıke Florens Naıtıngeıl týǵanyna 196 jyl tolyp otyr. Tórtkil dúnıede atalyp ótip jatqan bıylǵy shara «Medbıkeler – halyqtyń medısınalyq kómekke degen qoljetimdiligin arttyryp, ádildik úshin qyzmet etedi!» uranymen ótýde. Qazirgi tańda Qazaqstanda 26 memlekettik jáne 37 jeke medısınalyq kolledjde jyl saıyn orta eseppen 12 myńǵa jýyq orta býyn medqyzmetker daıyndalady. Búginde elimizde orta medpersonal sany shamamen 160 myń bolsa, onyń 10 mynnan astamy tek Almaty qalasynda densaýlyq kúzetinde. Elimizdiń memlekettik saıa­sattynda alǵashqy basymdyq halyq densaýlyǵyn qorǵaýǵa baǵyttalǵan. Halyqqa kór­setiletin medısınalyq kómek­tiń sapasy – onyń ýaqtyly kór­setilýi, aldyn alý sharalary­nyń, emdeý men qaıta qalpyna keltirýdiń durystyǵy arqyly belgilense, bul komponentterdiń sátti júzege asyrylýynyń negizi – medbıkeniń eńbegi, onyń kásibı sheberligi bolyp tabylady. Búgingi kúni medbıke mamandardyń áleýmettik mıssııasy izgilik jáne meıirimdilikpen ǵana shektelmeıdi, olardyń halyq densaýlyǵyn saqtaýda, medısınalyq kómektiń qoljetimdiligi men ońtaılylyǵyn arttyrýda mańyzdy ornymen belgilenedi. Qoǵamnyń eń basty baılyǵy – adam densaýlyǵy desek, osy qundylyqty saqtaýda sizder­diń úlesterińiz zor! – dep jıyn­dy ashyp, kóbine kóp elene bermeıtin medbıke isiniń qıyn­dyǵy men jaýapkershiligine toqtalǵan Densaýlyq saqtaý basqarmasynyń basshysy Ýálıhan Ahmetov birqatar eren eńbegimen kózge túsken eńbek maıtalmandaryn Almaty qalasy ákimdigi men qalalyq Densaýlyq saqtaý basqarmasynyń alǵys hattarymen marapattady. Bir aıta keterligi, atalmysh mereke qarsańynda qalanyń medbıke mamandary arasynda úzdikterdi anyqtaýda dástúrli túrde «Úzdik maman-2016» kásibı qalalyq baıqaý ótkiziledi. Bıyl qatysqan 25 úmitkerdiń arasy­nan saıys jeńimpazdaryn elimiz­diń medısına salasynyń ardager­leri Gúlshara Ǵazızqyzy men Ababkova Maııa Aleksandrovna «Úzdik meıirbıke», «BMSK úzdik meıirbıkesi», «Úzdik aký­sher» jáne «Úzdik feldsher» nomı­nasııalary boıynsha marapat­tap, aqshalaı, zattaı syılyqtar tapsyrdy. Bıylǵy merekeniń ereksheligi desek bolady – aýrýhana aldynda qatysýshylar men qonaqtardy Almaty medısına kolledjiniń júzge tarta stýdenti flesh-mob­pen qarsy alyp, dálizde OQKA-nyń medbıkeleri ár qatysýshyǵa gúl shoǵyn syılady. Gúlzeınep SÁDIRQYZY, «Egemen Qazaqstan»