Kóńil tolqytqan kesh

Kezinde «Kóńil tolqyny», «Aq jaýyn» atty kúılerimen kópshilikke keńinen tanymal bolǵan Qazaqstannyń eńbek sińirgen ártisi Seken Turysbekovtiń erekshe shabyttana oryndaıtyn kerbez kúılerin halyq tyńdaýdan áste jalyqqan emes. Keıde salaly saýsaqtary syrly pernelerden sıqyrly ún shyǵaryp, qos ishekti aspapty ómiriniń ózegine aınaldyrǵan tabıǵı talant ıesiniń kıeli ónerge degen tazalyǵyn kórip tánti bolasyń. Zer salyp qarasańyz, kúıleriniń ózi qarly shyńdar men Kók zeńgir aspandy baǵyndyrǵan qyran búrkitti kóz aldyńa elesteteri haq. Seken Turysbekovti qalyń jurtshylyq kúıshilik qyrynan ózge, sazger retinde de tanı biledi. Ol «Shaǵala», «Aqqý sazy», «Qońyr qaz» sekildi kóptegen ánderdiń avtory. Taıaýda Astana memlekettik akademııalyq fılarmonııasynyń uıymdastyrýymen ótken kúıshi-sazger S.Turysbekovtiń «Kóńil tolqyny» atty án keshinde buǵan taǵy bir kóz jetkizip qaıtqan edik. Shymyldyǵy «Uly dala» kúıimen ashylǵan bul konsertte Seken Turysbekovtiń ánderi men kúıleri oryndaldy. Sahna tórine shyqqan ol jı­nalǵan qaýymǵa qarata: «Ándi eki­niń biri uǵady, al, kúı qudiretin kóp adam den qoıyp, túsine bermeıdi. Sondyqtan, meniń án-kúıim men ónerimdi syılap kelgenderińizge rahmet!», – degen óziniń júrek­jardy alǵysyn bildirdi. Keshte kórnekti aqyn, Memlekettik syı­lyqtyń laýreaty Ulyqbek Esdáý­let óziniń dosyna arnaǵan «Saf» atty óleńin oqydy. Sondaı-aq, S.Turysbekovtiń ánderine sóz jaz­ǵan aqyn N.Aıtuly men U.Esdáý­lettiń birneshe óleńderin kópshilik jyly qabyldady. «Myna kórshi qytaı elinde «Aq jaýyndy» dombyrada, «Kó­ńil tolqynyn» kúısandyqqa salyp, «Qazaqtyń kúıi!» dep árbir konsertte oınaıdy eken. Osy jańalyqty estigende tóbem kókke eki eli jetpeı qalǵandaı kúı keshtim. Kúı – aýdarmany qajet etpeıtin dúnıe. Qara qytaı kúıimdi qazaqtyń kúıi dep tanysa, men úshin odan artyq qandaı baqyt bar? Orystyń bir uly sýretshisi «Meniń týyndymdy qytaı moıyndasa, onda álem tanyǵany dep biler edim» degen eken» – dedi kesh ıesi. Aıta keteıik, Seken Kárim­uly­nyń Astanada «Jazǵy qar», «Kúltegin», «Máńgilik el», «Aq­júnis», «Kókbóri», «Tóle­getaı» atty kúıleri dúnıege keldi. Al atalǵan án keshiniń taqyrybyna aınalǵan týyndyny avtor 1985 jyly, 24 jasynda shyǵarǵan eken. Shamasy, kóńili tolqyǵanda týǵan dúnıe bolsa kerek-ti. Al, «Aq jaýy­n» kún shaıdaı ashylyp turǵanda bir tógip ótetin jyly jańbyr. Sol aq jaýyn myna qatygezdik beleń alǵan zamanda barlyq derlik jamandyq ataýlyny shaıyp ketse eken degen adamı uǵymnan shyqqan shyǵarma eken. Halyqaralyq jáne respýblı­kalyq baıqaýlardyń laýreattary Kúnsulý Turlybekova, Jazgúl Danylbaeva, Perızat Turarova, Zýlfııa Baımurzaeva, Danııar Muqan, Áıgerim Nartýeeva, Tel­man Nurtaı, Rahat Begasylov, Jaqsygeldi Maıasarov, Jalǵas Sultan, Erlan Rysqalı sııaqty dástúrli ánshilerdiń oryndaýynda áýezdi án shyrqalyp, kúmbirlep kúı tartyldy. Zamanymyzdyń zańǵar jazýshysy Muhtar Áýezov: «Qazaqtyń uıaty men qasıeti tek kúıinde ǵana qaldy», degen eken. Olaı bolsa, kúı óneri de qazaq halqymen birge máńgi jasaı bermek. Raýshan SÚLEIMENOVA