Qazaqstan Respýblıkasynyń Bas Prokýrory Jaqyp Asanovtyń úndeýi

(«Prokýratýra týraly» Zańnyń 25-2-babynyń tártibinde) «Qazaqstan Respýblıkasy Pre­zıdentiniń 2016 jylǵy 6 ma­myr­­daǵy Jarlyǵymen Jer kodek­siniń keıbir normalaryn qol­danýǵa moratorıı jarııalandy. Memleket basshysynyń tapsyrmasymen Jer reformasy boıynsha Komıssııa quryldy. Onyń quramyna azamattyq qoǵam ınstıtýttarynyń basshylary men belsendileri kirdi. Azamattar Komıssııa ju­mysyna óńirlerde qurylǵan qoǵamdyq keńester arqyly da qatysa alady. Komıssııa otyrysynda pikir almasý barynsha ashyq. Onyń qyzmeti aqparat quraldarynda turaqty jarııalanýda. Arnaıy ashylǵan jerturaly.kz saıtynda qazaqstandyqtar óz suraqtaryn Komıssııaǵa qoıyp, usynys-tilekterin bere alady. Bir sózben, jer máselesi bo­ıynsha kez kelgen pikir bildirý úshin barlyq jaǵdaı jasalǵan. Alaıda, keıbir adamdar osyndaı jaǵdaı men zań talaptaryn elemeı, ortaq dıalogtan qashyp, halyqty zańsyz qarsylyq aksııa­laryna shaqyrýda. Áleýmettik, ultaralyq araz­dyqty qozdyrý úshin jalǵan aqparat ádeıi taratylyp jatyr. Mundaı áreketter Qazaqstan Respýblıkasynyń zańdaryna qaıshy keledi. Osyǵan baılanysty qoǵamdyq turaqtylyqty saqtaý úshin el azamattaryn mundaı arandatýǵa boı bermeýge, azamattyq ustanym men jaýapkershilik tanytýǵa shaqyramyn. «Prokýratýra týraly» Zańnyń 25-2-babyn basshylyqqa alyp, zańsyz mıtıngke shaqyrý, ony uıymdastyrý, tipti oǵan qatysýdyń ózi ákimshilik nemese qylmystyq jaýapkershilikke ákep soǵatynyn eskertemin. Quqyq qorǵaý organdary kez kelgen zań buzýshylyqtyń jolyn kesip, qylmystyq qýda­laýǵa deıin zańda kózdelgen sharalardy dereý qabyldaýǵa mindetti».