Qostanaıda eki júrginshi basyp ketken júrgizýshi ustaldy

QOSTANAI. 30 mamyr. Qostanaı qalasynda jol shetinde ketip bara jatqan eki adamdy basyp ketken kólik júrgizýshisi oqıǵa ornynda ustaldy. Onyń esirtki paıdalanǵany belgili boldy. Bul týraly oblystyq ishki ister departamenti baspasóz qyzmetine silteme jasaǵan egemen.kz tilshisi habarlady. Qostanaı aýdandyq ishki ister bólimi jol tehnıkalyq ınspeksııasynyń qyzmetkeri Tańat Álmaǵambetov jumystan tys ketip bara jatyp, kenet jol-kólik oqıǵasyn baıqap qalady. Túngi saǵat 02.00-de «ZAZ-Shans» mashınasynyń 32 jasar júrgizýshi jol shetinde ketip bara jatqan 23 jáne 26 jasar qyz ben jigitti basyp ketedi. Tańat jol-kólik apatyna sebepker mashınanyń aldynan tosqaýyldap, qashýyna mursha bermeı ustaıdy da, dereý «jedel járdem» jáne polısııa quramyn shaqyrdy. Jigit oqıǵa ornynda qaza tapty da, qyzdy qalalyq aýrýhananyń jan saqtaý bólimine aparǵanda qaıtys boldy. Aǵa serjant Tańat Álmaǵambetov: «Júrgizýshi júrginshilerdi meniń kóz aldymda basyp ketti. Men dereý qashqysy kelgen júrgizýshiniń aldyna kóldeneń turdym», – dedi. Jergilikti polısııanyń aǵa ınspektory Iýrıı Panasenko 1984 jyly týǵan júrgizýshiniń qanynan kóp mólsherde esirtki zaty tabylǵanyn aıtty. Qazir ol ýaqytsha oqshaýlaý ornynda otyr. Sotqa deıingi tergeý amaldary bastaldy. Júrgizýshi Qylmystyq kodekstiń 3 bólimi, 345-baby boıynsha «Jol erejesin buzǵan, eki jáne odan da kóp adamnyń ólimine sebepker bolǵan» degen aıyp taǵyldy. Kúdikti Qostanaı qalasynyń ortalyq kóshesinde basqa júrgizýshimen jarysqan. Názıra Járimbetova. Derek, foto: Qostanaı oblystyq ishki ister departamenti baspasóz qyzmeti.