Qaraǵandyda «Jasyl el» jastardy jumysqa shaqyrady

QARAǴANDY. 1 maýsym. «Jasyl el» jobasy qaraǵandylyq stýdent jastardy jaz aılarynda eńbek etip, tabys tabýǵa shaqyryp otyr. Uıymdastyrýshylardyń aıtýynsha, jumys istegen ár adamǵa aı saıyn 35-40 myń teńgeden jalaqy tólenedi. Oǵan qosa, maýsymdyq eńbekkerler arnaıy kıimmen, qural-saımandarmen qamtamasyz etiledi. Bul týraly egemen.kz tilshisi habarlady. Oblystyq shtabtyń jetekshisi Nurgeldi Omarhanovtyń aıtýynsha, qazir 16 jastan asqan jastardy jumysqa tartý sharalary júrip jatyr. Jumysqa, ásirese, tártibi qıyn jasóspirimderdi alý, ıaǵnı olardyń bos ýaqytyn paıdaly eńbekpen almastyrý kózdelip otyr. Bıylǵy maýsymda «Jasyl el» Qaraǵandynyń ózinde 250 jasty jumyspen qamtıdy. Olardyń bári alatyn jalaqysyn adal ári sapaly eńbek etip, mańdaı terimen tabýǵa mindetti. Bul oraıda qatań qadaǵalaý jasalady. Túlkibulańǵa salyp, aýyrdyń ústi, jeńildiń astymen júrgisi kelgenderge tıisinshe shara qoldanylyp, jalaqysy qıylýy múmkin. Aıta keteıik, «Jasyl el» jobasy qolǵa alynǵan on jyldan astam ýaqyt ishinde Qaraǵandyda 12 myńǵa jýyq adam jumyspen qamtylǵan. Osy aralyqta olar 300 myńnan astam aǵash otyrǵyzyp, 2,5 gektar jerdi óńdegen. «Jasyl el» eńbekkerleri, sonymen qatar, aramshópter julyp, ósimdikterdi sýarý jumystaryn da júrgizedi. Áleýmettik jobanyń aıasynda jastar soǵys jáne eńbek ardagerleriniń úı sharýasyna kómektesip, qolǵabys jasaıdy. Qaırat Ábildınov. Derek: egemen.kz. Foto: bnews.kz.