Saha halqy balýandy qoldaýǵa alańǵa shyǵady

ASTANA. 1 maýsym. Búgin Saha Respýblıkasynyń astanasy – Iаkýtsk qalasynda jergilikti ýaqyt boıynsha saǵat 20.00-de úlken mıtıng bolady. Bul týraly bloknot-yakutsk.ru saıtyna silteme jasaǵan egemen.kz tilshisi habarlady. Iаkýtsk qalasynyń turǵyndary Reseı chempıonatynda Olımpıada lısenzııasynan bas tartqan erkin kúres sheberi Vıktor Lebedevti qoldaý úshin alańǵa shyǵady. Sherýdi uıymdastyrýshylar Lebedevtiń Olımpıadaǵa qatysýyn qalaıtynyn, sol úshin barlyq múmkindikti jasaıtyndaryn aıtty. «Bizdiń balýan Olımpıadaǵa qatysýy kerek. Ol – talantty sportshy. Álemniń eki dúrkin chempıony. Keshe Reseıdiń jeti dúrkin chempıony atandy. Eger ol jarysta tóreshilerdiń kómegimen jeńiske jetkenin aıtyp, chempıon atansa, bul qazylardyń kinási. Al chempıon tek qana alǵa júrý kerek. Sondyqtan biz Lebedevtiń Olımpıada lısenzııasynan bas tartqanymen kelispeımiz. Ol Brazılııaǵa barýy kerek», dedi mıtıngti uıymdastyrýshylardyń biri jýrnalıst Nıkolaı Bıastınov. Vıktor Lebedevtiń keshegi jarysy týraly taǵy aıtsaq, ol Reseı chempıonatynda Olımpıada lısenzııasyn alǵan bolatyn. Biraq, beldesýde daǵystandyq balýan Ismaıl Mýsýkaev pen býrıatııalyq Aleksandr Bogomoevty tóreshilerdiń kómegimen jeńgenin aıtyp, óz erkimen Olımpıada lısenzııasynan bas tartqan. Dastan Kenjalın. Derek, foto: bloknot-yakutsk.ru