BEREKELI BIRLIGIMIZ – BAILYǴYMYZ
Elbasy Joldaýynda aıtylǵan maqsattarǵa jetkizetin basty qundylyǵymyz osy
* * *
«Prezıdent Joldaýy jyl saıyn el bolyp eleńdep kútetin mańyzdy qujatqa aınaldy. Bıylǵy Joldaýdyń jóni de, joly da ózgeshe. Negizgi baǵyt ta, basymdyq ta jańa áleýmettik saıasatty iske asyrýǵa arnalady. Elbasy eń mańyzdy 3 memlekettik baǵdarlamaǵa toqtaldy. Ol – bilim berý, densaýlyq saqtaý jáne tilderdi damytý máseleleri. Bular bizdiń qalamyz úshin de aıryqsha mańyzǵa ıe ekendigi belgili. Al Joldaý olardyń damyp, órkendeýi úshin barlyq jaǵdaıdy jasap otyr. Demek, aldymyzda memlekettiń tuǵyryn bıik ustaýǵa baǵyttalǵan mejeli mindetter tur. Endigi jerde Elbasy Joldaýynyń ár tarmaǵyn tarqatyp, tapsyrmalardy tyńǵylyqty júzege asyrý – barshamyzǵa ortaq mindet». Qazaqstan Prezıdenti Nursultan Nazarbaevtyń Joldaýyn talqylaýǵa arnalǵan aktıv otyrysynda Astana qalasynyń ákimi Imanǵalı Tasmaǵambetov osylaı dep jınalǵan qaýymǵa sóz arnady. Shahar basshysy óz baıandamasynda Elbasy Joldaýyn júzege asyrý jónindegi óńirlik jospar qabyldanǵanyn málimdep, onyń ár tarmaǵyn ýaqtyly oryndaý qajettigin basa aıtty. Otyrysta memlekettik tildi paıdalanýdy sapaly, jańa deńgeıge kóterý máselesine aıryqsha nazar aýdaryldy. Qala ákimi 2017 jyly qazaq tilin meńgergen qala turǵyndarynyń úlesin 80 paıyzǵa, 2020 jyly bul kórsetkishti 95 paıyzǵa deıin ósirý mejesine abyroımen jetý qajettigin atap aıtty. Al ekinshi kezekte 2013 jyly densaýlyq saqtaý salasyna biryńǵaı ulttyq densaýlyq saqtaý júıesin engizý nátıjeli aıaqtalýǵa tıis ekendigi, sebebi, bul halyqqa kórsetiletin qyzmettiń, ásirese, alǵashqy medısına-sanıtarlyq kómektiń joǵary sapaly bolýyn qamtamasyz etetini tilge tıek boldy. Osyǵan baılanysty I.Tasmaǵambetov qalanyń densaýlyq saqtaý basqarmasyna halyqtyń, eń aldymen balalar men jasóspirimderdiń, bala týý jasyndaǵy áıelderdiń densaýlyq jaǵdaıyn qadaǵalaýdyń jańa tetikterin ázirleýdi tapsyrdy. Sondaı-aq, Imanǵalı Nurǵalıuly óziniń orynbasarlary Vasılıı Krylov pen Aıda Balaevaǵa jáne Qanat Sultanbekovke Astananyń áleýmettik damý baǵdarlamasyn baqylaýǵa alý, qala ekonomıkasynyń naqty sektoryn jandandyrý baǵdarlamasyn daıyndaý, qysqa merzimde salalyq jospar ázirleý jóninde tapsyrma berdi. Láıla EDILQYZY. Astana.
