Irgemiz – tynysh, túnderimiz – beıbit, kúnimiz – nurly

«Eskige – jańa ólsheýish, ja­manǵa – jaqsy ólsheýish», deıdi bizdiń halqymyz. Keshegi keńes­tik kezeńde erkimizdiń shekteýli bolǵany sonshalyq, qalaýymyz qalyptan, tileýimiz tuıyqtan shyǵa almaı, kónbistikpen kún keshken edik. Allanyń qudiretimen Táýel­sizdikke jetip, óz jerimizge ózimiz ıe boldyq. Baqytty, qýat­ty derbes el bolý – babalardyń armany edi. Myna sheksiz ǵalamda óz da­lań men óz Otanyń bolǵany qandaı baqyt! Táýelsiz Qazaqstan tańǵa­jaıyp jetistikterge jetti. Mańdaıyna qasiret shekken halqyn uly ótkelden ótkizý taǵ­dyry jazylǵan N.Nazarbaev ul­tynyń uly armandaryn júzege asyra bildi. Az ǵana jylda aspannyń astyn jaınatyp, Astana-shahar turǵyzdy. Eldiń birligi artyp, berekesi kirdi. Irgemiz – tynysh. Túnderimiz – beıbit. Kúnderimiz – nurly. Mazasy qashyp, ala topalań bolyp jatqan elderdi de kórip otyrmyz. Súısingen bolyp, suqtana qaraıtyn qaraý jurttyń bar ekenin de ishimiz sezedi. Izgilikti isterimen, aqyl-parasatymen álemge tanylǵan Prezıdentti Qazaqstan halqy qoldaıdy. Eli Elbasyna senedi. Erteńi – keshegiden, keleshegi búgingiden jarqyn bolar dep úmittenedi. Sondyqtan da, Pre­zıdenttiń jyl saıynǵy Jol­daýyn asyǵa kútedi. Elbasynyń bıylǵy Jol­daýy­nyń mańyzdylyǵy – adam ómirin qorǵaýdyń, adam turmy­syn jaqsartýdyń, adam janyn izgilendirýdiń joldarynyń ba­ryn­sha keń qaras­tyryl­ǵandyǵynda. Bilim sapasyn damytýdyń, halyqqa medısınalyq qyzmet kórsetýdi kúsheıtýdiń, turǵyn úımen, tushy sýmen qamtamasyz etýdiń búgini men keleshegin meńzegen baǵdarlamalar – «óń­sheń ǵana jaqsy» oılar ja­nymyzdy jadyratty. Elbasynyń memlekettik tildi meńgergen qazaqstandyq­tar­dyń 2020 jylǵa qaraı, kem degende, 95 paıyzǵa jetýi tıis deýi – til taǵdyryna alańdaıtyn el zııalylarynyń oıynan shyq­ty dep oılaımyn. Bul ha­lyq­tyń kókeıinde júrgen másele edi. Bul mindet halyqtyń ózine de júktelip otyr. Qazaqstandy Otanym deıtin adamdar úshin qazaq tilin úırený – qasıetti is. Joldaýdyń bul joldaryna qalamger retinde men de úlken úmitpen qaraımyn. Qazaqsha kitap oqıtyn el bolamyz degen oı bizdi de yntalandyrdy. Jańa, kórkem týyndylardyń jazy­lýyna dem beredi. Men ózim malǵa baı, kezinde Talas Qarakól qoı zaýyty dep atalǵan qazaǵy kóp darqan ól­keniń qyzymyn. Jyldan-jylǵa turǵyndary qalaǵa qaraı kóship jatqan Úsharal degen aýylym­nyń taǵdyry oılantatyn. Bú­gingi Joldaýdaǵy halyqtyń ál-aýqatynyń kóterilýine, jumys­pen qamtylýyna, aýyl sharýa­shylyǵynyń damýyna baǵyt­tal­ǵan sharalardyń alǵa qoıylýy – meniń týǵan aýylymnyń ǵana emes, búkil aýyl-aımaqtyń qaı­ta gúldenýine sep bolar dep senemin. Erteńge degen senim – eldiń úlken tiregi. Kúlásh AHMETOVA, aqyn, QR Memlekettik syılyǵynyń laýreaty.