Qazaqstan voleıbol quramasy Meksıka komandasyn utty

ASTANA. 5 maýsym. Búgin voleıboldan Qazaqstannyń áıelder quramasy Álem Gran-prıi jarysynyń Aljırde ótken birinshi irikteý raýndyn Meksıka komandasyn jeńýmen aıaqtady. Bul týraly respýblıka voleıbol federasııasy baspasóz qyzmetiniń deregine súıengen egemen.kz tilshisi habarlady. Federasııa habarlaǵandaı, Qazaqstan voleıbolshy qyzdary qarsylastary qarsylyǵyn tórt partııada qaıtara bilgen. Olar alǵashqy eki sette básekelesterin 25:16, 25:20 etip erkin utyp shyqqan. Biraq úshinshi partııada meksıkalyqtar Vıacheslav Shapran shákirtterin sońǵy sátke deıin ýystarynda ustap turǵan. Olar aqyrǵy mezette jeńisti tartyp áketken – 25:21. Osydan keıin tórtinshi partııa da asa tartysty ótken. Degenmen, bar sheberlikterin salǵan qazaqstandyqtar eń sońynda mereılerin ústem ete bilgen. Esep – 25:23! Kezdesýde Qazaqstan quramasy sapynan Radmıla Beresneva (16 upaı), Lıýdmıla Isaeva jáne Krıstına Anıkonova (13 upaıdan) upaıdy kóbirek jınap, komandanyń jeńisine úlken úles qosty. Osylaısha birinshi irikteý raýndy oıyndaryn úshinshi topta ótkizgen Qazaqstan voleıbolshy qyzdary Aljır jáne Meksıka quramalarynan basym túsip, 6 upaı jınady. Olar tek Perýmen ótken birinshi oıynda ǵana qarsylastaryna ese jiberip aldy. Bizdiń qyzdar budan ári Álem Gran-prıi jarysynyń ekinshi irikteý raýndy oıyndaryna qatysý úshin Kolýmbııaǵa attanady. Oıyndar 11-13 maýsym kúnderi oınalady. Talǵat Raıymbek. Derek, foto: Qazaqstan voleıbol federasııasynyń baspasóz qyzmeti.