Túrli-túrli táttiler

Oral irgesindegi sharýa qojalyǵynyń kondıterlik ónimderi reseılikterge unaýda Oral shaharyna jalǵasatyn Jelaev óndiristik aýmaǵyndaǵy «Pop­kov» sharýa qojalyǵynyń egin egýmen qatar, óndirispen aına­lys­qanyna 20 jyldyń júzi boldy. Bastapqyda makaron ónim­derin shyǵarýmen aınalysty. Biraq naryqtan oryn tabý qıynǵa tústi. Al búginde kondıterlik jáne nan, vaflı, toqash ónimderin óndirýdiń sheberi atandy. Sapaly ónimderimen kúlli elimizge ǵana emes, kórshiles Reseı naryǵyna da tanylǵan. Munda kondıterlik ónimderdiń 30-shaqty túri óndiriledi. Sonymen qatar, kásiporyn nan ónimderimen Oral qalasyn turaqty qamtyp otyr. – О́nimderimizge Reseıdiń Chelıabi, Nıjnıı Novgorod, Sa­ma­ra, Saratov, Orynbor oblys­tarynan suranys mol. Pirán­dik pen vaflıimiz ondaǵy tutyný­shy­larymyzǵa unaıdy. Qazir máskeýliktermen kelisimshart jasaýǵa daıyndyqqa kiristik. О́ndirilgen ónimniń 50 paıyzy eksportqa Reseıge shyǵarylady. О́nim ótkizý jóninde Mańǵystaý, Atyraý, Aqtóbe, Ońtústik Qazaq­stan, Aqmola, Almaty, Shy­ǵys Qazaqstan óńirlerimen de ke­lisimsharttar jasalǵan. Daǵ­darysty sezinip otyrǵanymyz joq, jumysymyz yrǵaqty, – dedi «Popkov» sharýa qojalyǵynyń jetekshisi Alekseı Popkov. 2011 jyly kásiporyn «Bız­nes­tiń jol kartasy-2020» memle­kettik baǵdarlamasy boıynsha «Ses­nabank» AQ-tan nesıelik qarajat alyp, toqash jáne vaflı ón­diretin jańa jeli ornatty. Mem­lekettiń qoldaýymen «Damý» ká­sipkerlikti damytý qory arqyly bank nesıesiniń 14 paıyzdyq mólsherlemesiniń 50 paıyzyn sýbsıdııalaýǵa qol jetkizdi. Jańa eki jeliniń iske qosylýymen 30 adamǵa jumys ashylǵan. Barlyq óndiristik sehtardy qosa alǵanda 100 adam turaqty jumyspen qamtylǵan. О́ndiris ornynda táýligine 8 tonna ónim óndiriledi. О́nim óndirýge shıkizattyń 50 paıyzy ózderinen, qalǵan bóligin ózgelerden satyp alady. – Sharýa qojalyǵyna qaras­ty sehta jumys istegenime 2 jyl boldy. Bizder daıyn ónim­di qorapshalarǵa salamyz. Jala­qymyz turaqty, túngi aýysymǵa Oraldan jumys avtobýsymen tasymaldaıdy, – dedi jumysshy Samal Jangereeva. Sharýa qojalyǵynyń basshysy A. Popkov aldaǵy jumys jos­parynyń kóptigine toqtalyp jat­paı, ázirge ekonomıkalyq qıyn­shy­lyqtar kezeńinde turaqty jumystyń óndiris úshin mán-mańyzy zor ekendigin salmaqtap berdi. Gúlbarshyn ÁJIGEREEVA, jýrnalıst, Temir QUSAIYN, «Egemen Qazaqstan» Batys Qazaqstan oblysy