Tosynnan surapyl soǵys bastaldy da sóıtken Jamalbegi maıdanǵa attanyp kete bardy. Hat arqyly amandyǵyn bildirip turdy. Úshkir hat qolyna tıgen kúni Úkisary apanyń úıinde kishigirim toı-domalaq bolýshy edi. Otan qorǵaýshylardyń aman-esen oralýyn tilep, aq batalaryn berip jatatyn. Kóńil kúptiligin basatyn saǵynysh hattarymen birge qazaq aýylyna qaıǵy bultyn úıirip, «qara qaǵazdar» da keletin... «Qudaı saqtaı kór!»– dep quty qashyp júretinniń biri osy apamyz edi.
... Mine, jeti aı boldy, Jamalbekten hat-habar úzilgeli. Poshtashydan syr tartyp kórse, «jamanat habar jatpaıdy ǵoı, áldeqandaı sebeppen haty tejelip júrgen shyǵar...», – dep úmittendirip qoıady. Osylaısha ýaqyt zýlaı berdi. Jyldar almasty. Soǵys bitti ulyn zaryǵa kútýmen. El ishiniń «jalǵyzynyń joǵalǵanyn sezbeı ótse eken» degen kúńkili qulaǵyna emis-emis jetpeı qalyp ta jatqan joq. Ondaıda julyn-júıkesi, kóńili tas kereń bola qalady. Jalǵyz keıýanany júdetip-muqaltpaý nıetimen inisi balasyn onyń baýyryna salyp, septesti. Keıin ol bala sabaq yńǵaıymen qolynan sýsyp, ózge mektepke ketýge dýshar bolǵanda, jaqyn-jýyǵy Seıdaly degen balany qasyna qosty.
Áıteýir, qasiretten qajyǵan anany qoldap-qýattaýdyń qamy ǵoı. Seıdaly zaıyby Qazyna ekeýi analaryn meıirimmen baǵyp-qaqty. Úlken kisiniń shapaǵaty shyǵar, Seıdaly ozat shopan retinde el aýzyna ilikti. Tipti Qazaqstan Respýblıkasy Joǵarǵy Keńesiniń depýtattyǵynan úmitker turǵysynda baǵyn synap baqty. Soǵys zardabyn birjola óshti deý, bekershilik eken.
Úkisary ana sonyń zapyranyn kózi jumylǵansha jutqan shermende kisi edi. Seksenniń seńgirinde qatty naýqastanyp, sarytósekke tańylǵanda: «Jamalbegim elmen tabyssa, qushaqtaryńdy aıqara ashyp, tórlerińdi usynyńdar, meniń joqtyǵymdy bildirmeńder. Men úshin betinen súıip turyńdar!»– dep Seıdaly men Qazynaǵa ósıetin aıtyp úlgergen edi jaryqtyq. ... Osylaısha, Jangeldın aýdanynyń Aqkól aýylynda jalǵyz ulynyń ólimine sene almaı, ómirden ótken edi keıýana!
Jaqsylyq JÚNISULY,
QR Mádenıet qaıratkeri.
Arqalyq.
