Júldeger

Shańǵymen tuǵyrdan sekirý Qysqy Azııa oıyndarynda shań­ǵymen tuǵyrdan sekirý bu­qaralyq sıpat ala qoımaǵan sport túriniń biri. Oǵan, sirá, onymen aınalysý úshin de arnaıy sport qurylys nysany kerektiginen shyǵar. Ondaı sport qurylystary kóp elde tap­shy, tipti joq dese de bolady. Bizdiń elimizde de arnaıy shańǵy­men tu­ǵyrdan sekirý kesheni de osy Qysqy Azııa oıyndaryn ótkizýge baıla­nys­ty salynyp, paıdalanýǵa berildi. Endi bul sport túriniń damýyna elimizde jaqsy negiz qalandy dep nyq aıtýymyzǵa bolǵandaı. Sodan da, «ushatyn shań­ǵy­shy­lar» Almatyǵa kóp kele qoı­ǵan joq. Japonııa, Koreıa Respýb­lıka­sy, Qy­taı sııaqty elderden ǵana kelse, oǵan bizdiń jigitterimiz qo­syldy. Bir j­a­ǵy alań ıeleri bol­ǵan­dyqtan da eń kóbi bizdiki boldy. Olardyń da atyn atap keteıik: Radık Japarov, Nıkolaı Karpenko, Alekseı Korolev, Evgenıı Levkın, Konstantın So­kolenko. Olardy elimizde osy sport túri qarlyǵash­tarynyń biri bolǵan Qaırat Bıekenov jattyqtyrdy. Taǵy bir atap aıtatyn jaı: sporttyń bul túri Japonııada aı­ryqsha kúshti damyǵan. Japon jigitteri álemdik aýqymda eń myq­ty­larmen ıyq tirestirip jú­re­di. Bıyl­ǵy Azııa oıyndarynda da olar sol myqtylyǵyn kórset­ti. Úl­ken tuǵyrdan (K125) sekirýden olar altyn men kúmisti oljalady. Eki sekirýdiń alǵashqysynda 124 metrge, ekinshisinde 130,5 metrge «ushqan» Kazýıa Ioshıoka 233,1 ball jınap, birinshi orynǵa shyq­ty. Al Naganodaǵy Olımpııa oıyn­darynyń chempıony Kazýoshı Fýnakı odan 16 ball utylyp, ekinshi orynǵa qanaǵattandy. Al oǵan bar-joǵy 0,6 ball ǵana utylǵan bizdiń Nıkolaı Karpenko qola medaldi ıelendi. Nıkolaıdyń jeńisi – úl­ken je­tis­tik. Ońtústik Koreıa­nyń jigitteri de mundaı medaldan úmitker edi. Alda áli eki kúndik jarys bar. Kishi tuǵyrdan (K95) sekirý men komandalyq jarysta da jigitterimiz qorjynǵa olja salar dep úmittenemiz. Mamadııar JAQYP. Almaty.