34 mln. 790 myń teńge

osynsha aıyppul tóledi Qazir qorshaǵan ortaǵa beıjaı qarap, tabıǵatqa qııanat jasaıtyn iri kásiporyndar men óndiristik mekemeler kóp-aq! Olar kompanııanyń áleýetin arttyrý jolynda ónimdi kóptep óndirgenimen, aınalaǵa zııanyn keltirip otyrǵandaryn qaperlerine ala bermeıdi. Sondaı kásiporynnyń biri – Aqmola oblysyndaǵy «Altyn taý Kókshetaý» jaýapkershiligi shekteýli seriktestigi. Bul mekeme taıaýda tabıǵatqa orasan zor zalal keltirýi saldarynan 34 mln. 790 myń teńge aıyppul tóledi. Oblystyq mamandandyrylǵan tabıǵat qorǵaý prokýratýrasynyń habarlaýynsha, atalǵan kásiporyn iri mólsherdegi aıyppuldy der kezinde memleket qazynasyna aýdarǵan. – Kásiporynnyń óndiristik qaldyqtardy dalaǵa tókkeni anyqtaldy. Qazirgi tańda bizdiń tarapymyzdan tıisti sharalar atqarylýda. Sonymen qatar, tabıǵatqa zııanyn tıgizgen ózge de mekemelerdi anyqtap jatyrmyz, – deıdi prokýratýra ókilderi. Aıta keteıik, «Altyn taý Kókshetaý» seriktestigi 2014-2015 jyldary ekologııalyq uıymdardyń ruqsatynsyz óndiristik qaldyq­taryn ashyq aspan astyna tókken. Mamandardyń esebi boıynsha, 4 myń tonnadan asatyn óndiristik qaldyqtar tabıǵat aıasyna shashylǵan. Sonymen qatar, qazandyqtarǵa jaǵatyn 321 tonna kómir ruqsat etilmegen jerge tógilgen. Búginde tabıǵatty qorǵaý prokýratýrasy tarapynan elimizdiń ár óńirindegi óndiris oshaqtary jiti baqylaýǵa alynyp, olardyń qorshaǵan ortaǵa qanshalyqty zalal keltirip jatqany tekserilýde. Talǵat RAIYMBEK, «Egemen Qazaqstan»