Baq shappaıdy, bap shabady

Oıdy oı qozǵaıdy. Osydan bes jyl buryn Italııanyń Týrın qalasynda ótken qysqy Olımpııa oıyndary kezinde eldiń ekinshi qa­lasynda 20 gradýs jylylyqty kór­setip, ol shańǵyshylarǵa kóp aýyrt­palyq júktegen edi. Alaıda, bıiktigi 3 myń metrden asatyn Alpi taýlary eteginde ótip jatqan shań­ǵy jarystary kezinde -2 -3 gra­dýsty kórsetip turdy. Bir qyzym bir qyzymnan soraqy degendeı, Almatydaǵy aýa raıy +10 gradýstan asyp 5 jáne 10 shaqy­rymdyq shańǵyshylar ja­ry­sy kezinde Al­ma­tynyń aq jaýyny to­lassyz sirkirep ketti. О́kinishke oraı, qyz­dary­myz taǵy da tobyq­taı japon qyz­darynyń kóleńke­sinde qalyp qoı­dy. Ja­pon­­nyń qos juldyzy Ishıda Masako men Nadsýmı Madoka máre syzyǵyn birinen keıin biri qıyp altyn men kúmisti qaǵyp tús­ti. Úshinshi orynda Qytaıdyń qara qyzy Lı Hongkıe, Elena Kolomına men Svetlana Malahova tór­tinshi, besinshi oryndardy qa­na­ǵat tutty. Jarys aıaqtalǵannan keıin S.Ma­lahovamen tildesip úlgerdik. – Sharshaǵanymyz ras, altyn almasaq ta júldegerler qataryna iligemiz be dep bar kúshimizdi sa­lyp edik. Amal bar ma, japonnyń qos qyzy bizden aılasyn asyryp ketti. Shańǵy maılaýda da kemshilik bol­dy ma dep oılaımyn, – dedi entigin basa almaı turǵan jerlesimiz. Bizdińshe, másele shańǵy maılaýda emes sııaqty. Bul jerde másele bapkerlerdiń qateliginde shyǵar. Japon men qytaı qyz­dary Astana men Almatydaǵy Azııa oıyndary bastalar kezde Álem kýbogynyń sońǵy kezeń­derine qatysqan joq. Iаǵnı, olar taktıkalyq jaǵynan utyp, Qa­zaq­stanǵa tyń ári sergek keldi. Onyń ústine, jasyratyny joq, qyzdarymyz sharshap qalǵan sııaqty. Jastarynyń da kelip qalǵanyn nazardan shyǵarmaǵan jón. Demek, olarǵa laıyq izbasarlar ázirlesek, utarymyz anyq. Qyzdar jarysynda 8 júırik bolsa, 10 shaqyrymdyq shańǵy ja­ry­synda 6 azamatymyz jarys jo­lyna shyqty. Jańbyr tolastar emes. Aýa raıynyń qolaısyz­dyǵy­na qaramastan jankúıer­lerdiń aı­qaıy Soldatsaı aýma­ǵyn kúmbir­letip jiberdi. 5 sha­qy­rymda Alekseı Poltoranın 0,3 sekóntpen kósh bastaǵanda qýa­nyp edik. Taǵy da japonnyń qos júırigi Iýshıda men Shımızý birazdan keıin Alekseı men Nıkolaı Chebatkony shań qap­tyryp ketti. Átteń! Qolda turǵan al­tyn­nan taǵy da aırylyp qal­dyq. Nátıjesinde Nıkolaı Chebatko ekinshi, Alekseı Poltoranın úshin­shi bolyp máre syzyǵyn qıdy. – Aýa raıynyń qolaısyz bol­ǵany belgili, biraq ta jigitter qansha talpynǵanmen shańǵy maıy saı kelmeı kibirtiktep qala berdi. Búgin jigitterimiz demala­dy, es­tafetada esemizdi jibermeıtin shy­­­ǵarmyz, –  dep aǵynan ja­ryl­dy jarystan keıin Rıdderdegi da­ryndy balalarǵa ar­nal­­ǵan sport mektebiniń dırek­tory, belgili shań­­ǵyshy Vladımır Knaýb. Rıdderdegi sport mektebinde qa­zir 150-ge jýyq bala jat­ty­ǵýda. Onyń ishinde Úrjardaǵy belgili bapker Qaınıkamal Júsi­p­ovanyń bir­neshe shákirti bilimi men biliktiligin jetildirip ja­tyr. Jas­óspirimder arasynda álem chempıo­natynyń júl­de­gerleri de kórinýde. Endeshe, bererin berip, alǵanyn al­ǵan shań­ǵyshy qyz-jigitterge senim arta bermeı, osyndaı talantty jas­tarǵa kóńil aýdarsaq, upaıy­myz túgel bolary sózsiz. Sonda ǵa­na qys­qy sport túr­lerinen qazaq eli Olımpııa oıyn­darynda kósh so­ńyn­da qa­lyp qoı­maıtyny sózsiz. Bul endi barlyq jankúıerlerdiń júre­gi­­nen shyqqan tilegi. Son­dyqtan bapkerler men basshy­larǵa osy ba­ǵyt­ta jumys istep, elimizdiń namy­sy úshin baryn salatyn kezi jetti dep oılaımyz! Ońdasyn ELÝBAI.