Qola ózimizde qaldy

Short-trek Azııa oıyndarynyń ishindegi asa qyzyqtylarynyń biri – short-trek. Jyldamdyqpen qosa muz aıdynyndaǵy aınalmaly do­ǵa­lardy durys ári tıimdi aı­na­lýdy talap etetin qysqy sport oıyndarynyń bul túri Astana­daǵy Respýblıkalyq velotrekte 31 qańtar kúni bastalǵan bola­tyn. Úsh kúnge sozylǵan qyzý doda 2 aqpanda óz máresine jetti. Short-trek oıynynda Qazaq­stannyń atynan Nurbergen Ju­ma­ǵazıev, Aıdar Bekjanov, Artýr Sultanǵalıev, Darıa Volokıtına, Inna Sımonova syndy sportshylar baqtaryn synady. Jarystyń alǵashqy kúni 1500 metrlik qashyqtyqqa erler men áıelderdiń júgirisine arnal­dy. Ońtústik Koreıanyń short-trek­shileri bul qashyqtyqta bári­nen de oza shaýyp, birinshi jáne ekinshi oryndardan qatar kórindi. Erler arasynda 2 mınót 18,998 sekóntte syrǵanap shyqqan oń­tús­tikkoreıa­lyq No Djınkıý al­tyn medaldi ıelense, kúmis medal ta­ǵy da onyń otandasy Ým Chhyn­hoǵa, al qola medal qytaı­lyq sportshy Lıý Sıanveıǵa bu­ıyrdy. Áıelder arasyndaǵy 1500 metr qashyq­tyqta altyn jáne kúmis júldeni Ońtústik Koreıa ókilderi Cho Ha Rı men Pak Synhı ıelense, qola medaldi Sakýraı Bıba (Japonııa) oljalady. Shynyn aıtý kerek, osyǵan deıin bizge alǵa umtylyp shyǵýǵa bir nárse jetispeı-aq turatyn. Jarystyń ekinshi kúni tájirı­bedegi shıkilikter anyq kórine bastady. Bul kúni 500 metrlik qashyqtyqta erler men áıelder ózara synǵa tústi. Oıynnyń so­ńy­­na deıin bizdiń sportshy­lary­myz júldeli oryndardan úmit­terin úzbedi. Munyń bárin olar­dyń jeńiske degen kúsh-ji­ger­lerinen, muz aıdynyna shyq­qan­ǵa deıin jasaǵan jatty­ǵý­larynan da kórýge bolady. О́z­deri jas bolsa da jigerli ári rýh­ty sezimderi olardy únemi je­ńiske jete­leý­men boldy. Short-trektiń eń soń­ǵy kúninde 1000 metrlik erler men áıelderdiń dodalary, 3000 metrlik áıelder estafetasy, 5000 metrlik erler es­tafetasy ótki­zildi. Bir qýa­nysh­tysy, jarys­tyń úshin­shi kúni qazaq sport­shylary úshin asa sátti boldy deýge bolady. О́ıt­keni, bul kúni olar buryn-sońdy jetpegen jetistikke jetti. 5000 metrlik erler estafeta­synda ýaqyt pen jyldamdyq ja­ǵynan qytaılardy basyp ozǵan olar qola medalǵa ıe boldy. Altyn medal Koreıaǵa berilse, kúmis júldeni Japonııa enshiledi. Áıelder arasyndaǵy 3000 metr­lik estafeta da sátti ótti. Bul jerde de bizdiń arýlar ózderiniń shapshańdyqtarymen Japonııany basyp ozyp, úshinshi oryndy ıelendi. Birinshi oryn Qytaıǵa, ekin­shi oryn Koreıaǵa tıesili boldy. 1000 metrlik erler men áıelder arasyndaǵy jarysta oljaly bola almadyq. Qytaı, Koreıa men Japo­nııa­nyń sportshylary syrǵanaý tehnıkasy jaǵynan shynymen de bizden basymdaý ekendikterin kór­setti. Qarsylastarynyń aldaryna shyǵa bilgen Nurbergen Juma­ǵalıev pen Artýr Sultanǵalıevti, Aıdar Bekjanov pen Inna Sı­monovany qarsylastary uzatpaı basyp ozyp ketti. Araı ÚIRENIShBEKQYZY.

JATTYǴÝDAN – JEŃISKE

Short-trekten Japonııanyń bas bapkeri Iýka KAMINAMEN áńgime.

– Iýka Kamına, muz aıdy­nyndaǵy jelaıaqtar jary­synyń álem chempıonaty osy­dan dál otyz jyl buryn ótken eken. Sizdińshe, osy ýaqyt ara­lyǵynda short-trek jarysy­nyń damý deńgeıi qandaı? – Árbir istiń bastalýy úshin biraz ýaqyt ketip qalady. Sol chempıonatqa 30 jyl tolsa, men de osy jyly 30 jasqa kelip otyr­myn. Alǵashqy chempıonat kezinde sábı bolǵanymmen, kúni búginge deıin, bul salany tereń meńgerýmen kelemin. 1988 jyly Kanadanyń Kalgarı qalasynda ótken XV Qysqy Olımpııa oıyn­darynda short-trek kórsetilim oıyn retinde ǵana ótti. Ol 1992 jyly Fran­sııanyń Albervıl qalasynda ót­ken Qysqy Olımpıada baǵdar­la­masyna engizildi. Al Kanadanyń Vankýver qala­syn­da ótken Olımpııa oıyn­daryn­da short-trekten 8 medal topta­masy úshin erler men áıelder ara­syn­da 500, 1000, 1 500 metr qashyq­tyq­­taǵy jarystar ótti. Osyndaı maz­muny tereń, iri jıyndardyń biri endi mine, sizderdiń elderińizde ótip jatyr. – Sheteldik bapker retinde osy Azıadadaǵy short-trek ja­rysynyń ótý deńgeıin qalaı baǵalaısyz? – Barlyǵy da óz deńgeıinde ótýde. Jarystyń oıdaǵydaı ótýi­ne barynsha jaǵdaı jasalǵan. Erekshe atap ótetinim, stadıon­nyń halyqaralyq talapqa saı sa­l­ynǵandyǵy. Kez kelgen sportshy úshin onyń óner kórsetetin orny erekshe qyzmet atqaratyny belgili. Mundaı jańa ǵımaratta al­ǵashqylardyń biri bop, óner kórsetý – bizge kórsetilip jatqan qurmettiń bir elementi ispettes. Sportshylarym da dán rıza. Kózqarasym túzý, baǵam oń. – Azııa elderi arasynda muz aıdynyndaǵy sporttyq ja­rys­tarda japondyq sport­shy­lardyń bási basym. Bunyń syry nede? – Short-trek jarysyn jaqsy meńgerý úshin eń bastysy – shap­shań­dyq kerek. Ol – qysqa qashyq­tyqta jyl­dam syrǵanaıtyn kon­kı tebý sportynyń bir túri. Sportshy­lar bul oıynda uzaq qashyqtyqta emes, ke­risinshe, qys­qa qashyqtyqta el­lıps táriz­des muz aıdynyndaǵy dóńge­lekti muz­jo­laq­ta jyldam syr­ǵanap ja­ry­­sady. Biz árdaıym jat­tyǵý ús­tin­demiz. Kúndelikti jatty­ǵý­dyń ózine uzaq ýaqyt jumsaımyz. Me­reıi­miz­diń ústem bolýynyń qu­pııa­sy da, bál­kim, osynda bolar. Má­selen, biz­diń sportshylar osyn­da kelgeli ber­gi bar ýaqytyn tek jat­tyǵýǵa arnaýda. Qajet deseńiz, ásem As­tananyń demalys oryn­da­ryn ta­ma­shalaýǵa ýaqyt taba almaı kelemiz. Al, tamaq­tanatyn asymyz sýshı. Odan ózge eshqandaı da qupııa joq. Áńgimelesken Juldyz BAIDILDA.