Aýyldastar alǵysy

Aınur Baıramovanyń kindik qany tamǵan jeri – Ázerbaıjan Respýblıkasy bolsa, ortasyn tanyǵan Otany – Qazaq eli. Jórgekte jatqan sábı kezinde ata-anasy Qazaqstanǵa qonys aýdarypty. Ákesi orman sharýashylyǵynda, anasy aýrýhanada medbıke bolyp eńbek etedi. Osyndaı otbasynda dúnıege kelgen Aınur Shyǵys Qazaqstan oblysynyń Besqaraǵaı aýdanynda ósti. 1997 jyly aýdan ortalyǵyndaǵy mekteptiń tabaldyryǵyn attaǵan ol toǵyzynshy synypqa deıin aýylda oqydy. Odan keıin Almaty qalasynda Abaı atyndaǵy Qazaq ulttyq pedagogıkalyq ýnıversıtetiniń janyndaǵy kolledjge aýdarmashy-referent mamandyǵy boıynsha oqýǵa tústi. Kolledjdi bitirgen soń arnaıy orta bilim bazasy negizinde Shákárim atyndaǵy Semeı memlekettik ýnıversıtetinde shet tilder mamandyǵy boıynsha bilim aldy. Aǵylshyn jáne qytaı tilderin meńgerýge talpyndy. Janyna jaqyny – álem halyqtarynyń baılanys tiline aınalǵan aǵylshyn tili bolyp shyqqan boıjetken joǵary oqý ornyn bitirgennen keıin de tildi tereńdete meńgerýdi toqtatqan joq. Sońǵy jyldary elimizdegi qanatqaqty joba retinde Shyǵys Qazaqstan óńirinde kóptildildik baǵdarlamasy engizilip jatqany belgili. Osyǵan oraı Aınurdyń alǵan bilimi suranysqa ıe mamandyqtardyń birine aınaldy. Sebebi, aýyldarda úsh tuǵyrly til baǵdarlamasynyń bir butaǵy sanalatyn aǵylshyn tiliniń mamandary tapshy, tipti, jetispeıdi deýge de bolady. Osy olqylyqtyń ornyn toltyrýǵa umtylǵan ol 2012 jyly oqý bitirgen soń Besqaraǵaı aýylyndaǵy ózi oqyǵan Boras orta mektebine muǵalim bolyp ornalasty. Shákirtterin álemdik tilde sóıletýge kúsh salǵan aǵylshyn tili pániniń muǵalimin búginde barsha aýyldastary qurmet tutady. 24 jastaǵy jas ustazdyń mekteptegi eńbek ótiline – 4 jyl. Az ýaqytta alǵyrlyǵymen aýyldastarynan alǵys alyp úlgerdi. Ana tilimen birge memlekettik tildi hám aǵylshyn, orys tilderin erkin meńgergen ázerbaıjan ultynyń arýy besqaraǵaılyq jastarǵa úlgi. Aınur – qoǵamdyq ómirde bel­sendilik tanytyp, oblystyq, aýdandyq deńgeıde ótken is-sharalardyń bel ortasynan tabyldy. Jastar forýmyna, túrli keleli basqosýlar men konferensııalarǵa qatysyp keledi. «Jasotandyqtar» quramynda tikeleı ózi de aýqymdy sharalar uıym­dastyrady. Aıtalyq, Aınur Rov­shanqyzy búginde Besqaraǵaı aýdan­dyq Dostyq úıiniń ázerbaıjan etno­mádenı birlestiginiń jetekshisi, aýdan­dyq «Dostar» etnomádenı jas­tar tobynyń belsendi múshesi retin­de jastardy taǵattylyqqa tár­bıe­leıtin jobalardy qolǵa aldy. – Qazirgi kezde balalardyń til úı­renýge degen qushtarlyǵy erekshe. Barlyǵy da birneshe til bilgisi keledi. Biraq, qabilet-qarymyna qaraı oqýshylardyń tildi meńgerý deńgeıi ártúrli bolyp keledi. Memleket basshysy Nursultan Nazarbaev elimizde úshtildilikti damytýǵa basymdyq bergeni belgili. Osy oraıda oqýshylar aǵylshyn tilin birinshi synyptan bastap oqýǵa den qoıýda. Balalar qosymsha sabaqtarǵa kelý arqyly til meńgerýge belsene qatysýda, – degen Aınur ótken jyly Elbasy, Qazaqstan halqy Assambleıasynyń Tóraǵasy Nursultan Nazarbaevtyń Alǵys hatyna ıe bolǵanyn zor maqtanyshpen jetkizdi. – Konstıtýsııa kúninde berilgen bul marapat mereıimdi ǵana ósirip qoıǵan joq, sonymen birge, erteńgi kúnge degen senimimdi de nyǵaıta tústi, – deıdi muǵalıma qyz. Dýman ANASh, «Egemen Qazaqstan» Shyǵys Qazaqstan oblysy, Besqaraǵaı aýdany