Isekeshev iske kiristi

Astana ákimi Áset Isekeshev óziniń jańa qyzmetine kirisken kún­nen bastap bas qalanyń barlyq aýdandaryn aralap, tirshilikti qam­tamasyz etýdiń tirekti nysandarymen tanysty.  Shahar basshysy eń aldymen osy ýaqytqa deıin talaı synnyń aıtylýyna arqaý bolǵan atyshýly Taldykólge at­­basyn burdy. Qattyraq jel soqqan­da qolqany qabar jaǵymsyz ıis elor­dalyqtarǵa edáýir qolaısyzdyqtar týdyratyny týraly jaısyzdaý áńgimeniń árkez kóterilip júrgeni jasyryn emes. –  Bul máseleni udaıy nazarda us­taı­tyn bolamyz. Elbasynyń osyǵan baı­lanysty tapsyrmasy belgilengen merziminde ári múltiksiz oryndalýǵa tıis, – dedi ol toqsan aýyz sózdiń tobyqtaı túıinin aıtyp. Sol arada jumys júrgizip jatqandar ákimge kóldi qurǵatý baǵytynda basy qaıyrylǵan sharýalardyń barysyn baıandap berdi. Bul rette, ásirese, las sýdy tazalaıtyn qosymsha qondyrǵylar ornatý men tozǵan toraptardy qaıta jóndeýge aıryqsha nazar aýdarylýda eken. Byltyrdan beri munda qalanyń qaldyq sýlaryn jiberý toqtatylǵan. Osy jyldyń aıaǵyna qaraı kóldiń tabany tegis tazartylmaq. Elorda meri, sondaı-aq, astanalyq­tardyń kúndelikti turmysynda aıtar­lyqtaı oryn alatyn ekinshi jáne úshinshi jylý energetıkalyq ortalyqtaryna baryp, aldaǵy jylytý maýsymyna daıyndyq deńgeıin tekserdi. Atalmysh kásiporyn jetekshileriniń aıtýyna qa­raǵanda, ekinshi JEO-da qyr astyndaǵy qys túskenshe №5, 6, 7 qazandyq agregattaryn iske qosý josparlanyp otyrǵan kórinedi. Eger osy joba oıdaǵydaı júzege assa, jalpy jylý berý múmkindigi 400 G-kalǵa sheıin artpaq. Al úshinshi JEO-nyń birinshi kezegin salý jumystary kestege sáıkes jalǵasýda. Astana qalalyq energetıka basqar­masynyń basshysy Baqtybek Japaevtyń sózine sensek, kásiporynnyń tapqan, taıan­ǵan tabysy tolyqtaı ınvestısııalyq baǵdarlamalardy oryndaýǵa jumsalady. Demek, bular ózin ózi qamtamasyz etetin­dikten, bıýdjet qarjysy shyǵyndalmaıdy. Onyń ústine úshinshi JEO-nyń ekinshi kezegi memleket-jeke menshik áriptestigi aıasynda paıdalanýǵa berilmek. Energetıktermen áńgime kezinde Á.Ise­keshev qýat kózderiniń qurylysyn júrgizý men qaıta jaraqtandyrý­dyń kez kelgen qala úshin strategııalyq zor mańyzy baryn, al elordada onyń qajettiligi tipten arta túsetindigin atap ótti. О́ıtkeni, qazir ekinshi jáne úshinshi JEO-daǵy aýqymdy ister aıaqtalsa, jylý jetispeýshiligin jaýyp, Astanany úzdiksiz energııamen qamtamasyz etýge jan-jaqty jaǵdaı jasalatyn bolady. Tabıǵattyń tasyr minez tanytýy sebepti keıingi kúnderi Astananyń kom­mýnaldyq qyzmetteri kúsheıtilgen re­jimge kóshirildi. Tolassyz jaýǵan jańbyr saldarynan keıbir kósheler kólkip ketti. Osyǵan oraı ákim Áset Isekeshev sý basý­dyń saldaryn joıý jóninde jedel keńes ótkizip, barlyq kúshterdi ortaq maq­satqa jumyldyrýdy tapsyrdy. Ázirge aspan qabaǵynyń ashylatyn túri baıqalmaı tur. Aldymyzda aıtýly mereke – Astana kúni toılanbaq. Oǵan ázirlik sharyqtaý shegine jetkeni ámbege aıan. Endeshe, elorda basshysynyń qalanyń qarbalas tirliginen bir sát boı tartyp, entigin basýyna ýaqyty joq ekendigi talas týdyrmasa kerek. Talǵat BATYRHAN, «Egemen Qazaqstan»