Sýpergıgant+slalom=sýperkombınasııa

Burnaǵy kúni Shymbulaqqa qar qalyń tústi. Alǵashqyda shyrshalardyń aq ulpaǵa oranǵan qylqan japyraqtary óziniń qysqy beınesin jańa tapqanyna qyzyqqanymyzben, qardyń tolastar túri joq ekenine kózimiz jetkende qaýiptene bastadyq. Kúdiktengenimizdeı boldy, Tabı­ǵat-ananyń japalaqtaǵan qar men  býaldyr tumannan turatyn tosyn tartýy sýperkombınasııa jary­syn á degende baqandaı úsh saǵat­qa (10:00-13:00) kesheýildetse, al ýaqyt óte kele básekeniń keıinge shegerilgeni habarlandy. «Eshten, kesh jaqsy», aspaly arqan jolymen keshe Shym­bu­laqqa taǵy kóterildik. Aspan shaı­­daı ashyq eken. Abaı shyńy­nyń altyn tájge uqsas úsh bıigi anyq kórinedi. Taý shańǵysynyń sýperkombınasııa túri boıynsha áıel­der arasynan alǵashqy bo­lyp ja­rys jolyna almatylyq Lıýdmıla Fedotova shyǵyp, 1 km. 640 m. qa­shyqtyqty 1 mınót 8,67 se­kónt­te quldılap  ótti. Al Ońtústik Ko­reıa­­lyq Kım Sýn Jý bul qashyq­tyqty 1 mınót 8,31 sekóntte syr­ǵanap, bizdiń sheberden sál de bolsa jyldam ekenin dáleldedi. Irandyq shańǵyshy Kalhor Zıda atty qyzdyń jyl­dam­dyǵy 1 mı­nót 13,52 sekóntke qaraı aýyt­qydy. О́zbek, Mońǵol, Palestına elderinen kelgen taý shańǵyshy­lary da sońǵy sho­ǵyr­dan tabyl­dy. Qorqyp, qulap, ja­rys joly­nan tys qalyp jat­qandar da joq emes aralarynda. Tek qana qazaq­standyq Ksenııa Stroılova  ǵana olardan 1 mınót 12. 22 sekónt ná­tı­jesimen erekshelene tústi. Sýperkombınasııa - sýpergıgant jáne slalom jarystaryn biriktiretin sport  túri. Mysaly, sýpergıgant asa qatty jyldam­dyqty qajet etse, slalom – jıi-jıi burylystan turatyn tehnı­kalyq jaǵymen erekshelenedi. Jarys sońynda osy eki sport túriniń nátıjesi birge esepteledi. Sóıtip, sýperkombınasııa báseke­si­niń alǵashqy syny – sýpergıgant nátıjesi boıynsha Kım Son Djý – birinshi, Lıýdmıla Fedotova men Ksenııa Stroılova ekinshi jáne úshinshi orynǵa taban tiredi. Al budan keıin bolatyn slalom  básekesi bul nátıjeni qalaı qaraı ózgertpek? Arada bir ja­rym saǵat ótkende ol da anyq­ta­lyp, slalom boıynsha jarystyń qorytyndysynda Lıýdmıla Fedotova Azıadanyń altyn medaline ıe bolsa, kúmis – Ońtústik Koreı shańǵyshysy Jeong Soraǵa, qola – Ksenııa Stroılovaǵa buıyrdy. Ońtústik Koreıanyń altyn medaldan úmitker úzdik shańǵyshysy Kım Sýn Jý jıi burylystardan turatyn qarly jolda óte joǵar­ǵy jyldamdyqty ıgere almaı, ja­rys jolynan shyǵyp qaldy. Al taý shańǵysynyń sýperkombınasııa túri boıynsha jarys jolyna 13 elden kelgen 24 sa­ıyp­qyran shyqty. Qazaqstan ta­rap­y bul básekege Shyǵys Qazaq­stan oblysynyń túlegi Igor Zakýrdaev pen almatylyq Dmıtrıı Koshkındi úkilep qosypty. Bul eki sańlaq munyń aldyndaǵy báseke­lerde bir-bir altyn, bir-bir kúmis medalǵa ıe bolyp, jankúıerler senimin aqtaǵan bolatyn. Igordiń jasy bıyl jıyrma tórtke, al Dmıtrııdiń jasy jıyrma beske tolady. Bul - sport­shylar úshin naǵyz kemel jas. Bir qyzyǵy, olardyń qarsylastary arasynda «shaý tartqan» shańǵy­shy­lar da bar bolyp shyqty. Biraq olar, soǵan qaramastan, shańǵy­da­ıyn «tulparlarynan» áli túspe­gen. Mysaly, úndistandyq sport­shy Chand Lýdhar 1972 jyly, al Moń­ǵol elinen kelgen Aranzalzýl  Chagnaa 1973 jyly dúnıe esigin ashypty. Sonymen, Ońtústik Koreıa, Mońǵolııa, Úndistan, Iordanııa, Iran, Nepal, Qyrǵyzstan, Tájik­stan, О́zbekstan sııaqty taǵy bas­qa Azııa elderinen kelgen  shań­ǵy­shylardyń «sheberlikterine» birneshe kúnnen beri syralǵy bolyp qalǵan bizdiń barystardyń qaýip­tenýine eshqandaı negiz joq sııaq­ty edi. Biraq, sýperkombınasııadan úkili úmitimiz, Azııa chem­pıo­ny atanyp úlgergen D. Koshkın... Já, ol týraly sál keıinirek. Kóp kúttirgen jarysta Shyǵys Qa­zaqstandyq Igor Zakýrdaev jaq­sy nátıjege qol jetkizip, qul­dılaý qashyqtyǵyn 1 mınót 3,52 sekónt­te júıtkip  ótti. Al Oń­tústik Ko­reıa­lyq Kım Voosýng bul mejeni 1 mınót 4,4 sekónt ýa­qyt­pen utyp, ekinshi orynǵa taban tiredi. Sóıtip, bul básekedegi al­ǵash­qy synnyń nátıjesi bo­ıyn­sha Igor Zakýrdaev – birinshi, Djýng Dongheng – ekinshi, koreıalyq taǵy bir tarlan Kım Vosýng  (1 mınót 5,13 sekónt) – úshinshi orynǵa taban tiredi. Al, ókinishke qaraı,  Dmıtrıı Kosh­kın­niń kóńili áldenege qobal­jy­dy ma, áıteýir, jaqsy-aq júıtkip kele ja­typ jarys jolynan oqys shyǵyp qaldy. Biz osy sátsiz­diktiń sebebin suraǵanymyzda eli­mizdiń taý shań­ǵysy sporty komandasynyń bas bapkeri Sergeı Chaadaev: – Dmıtrıı jarys jolyn óte jyldam bastady. Eshteńeden aıanǵan joq. Mundaı táýekelmen birinshi oryn alýǵa da bolar edi, biraq qatelik jiberip aldy. Básekeniń aty báseke ǵoı, – degen. Dmıtrıı Koshkınniń ózi bolsa, jankúıerler kóńilin beıjaı qylǵan sátsizdigi jaıly: – Ýaqyttan utý úshin 100%-dyq táýekelge bel býdym. Bul óte joǵary jyldamdyq bolatyn. Al bir jalaýshadan ekinshi jalaý­sha­ǵa deıingi aralyqtaǵy shuǵyl bu­ry­lys­ta radıýs boıynsha qaqpaǵa dál kele almaı qapy qaldym, – degen. – Múmkin keshegi jaýǵan qardyń keri áseri bolǵan shyǵar? –Joq, jarys joly keremet! Keshegi qardan keıin bári jaqsy daıyndalypty. Komandanyń bas bapkeri Sergeı Chaadaev taý shańǵysynyń sheberi Igor Zakýrdaevtiń ónerine razy eken. – Igordyń quldılaı júıt­kigen ónerine kóńilim toldy. Ol shekten tys kúsh jumsamaı-aq jaqsy nátıjege qol jetkizdi. Endi alda slalom básekesi kútip tur. Koreıa eliniń sportshysy aldy­myz­dy orap ketpese boldy, – degen ol. Bapker qaýpi durys eken. Al­ǵashqy básekede Dmıtrıı Koshkın­niń joly bolmaǵandyqtan, erler arasyndaǵy slalomda Igor Zakýrdav altyn medalǵa qol jetkize almady. Sóıtip, sýperkombınasııa boıynsha Ońtús­tik Koreıalyq Djýng Dongheng – altyn, Igor Zakýrdaev – kúmis, taǵy bir koreılik Kım Voosýng qola medal aldy. Sonymen, sýperkombınasııa bo­ıyn­sha sarapqa salynǵan eki altyn­nyń bireýi Qazaqstan shań­ǵy­shysy Lıýdmıla Fedotovaǵa, ekinshisi Oń­tústik Koreıanyń maq­tanyshy Djýng Donghengke buıyr­dy. Sondaı-aq, kúmiske – Igor Zakýrdaev, qolaǵa – Ksenııa Stroılova ıe boldy. Kósemáli SÁTTIBAIULY. Shymbulaq shatqaly.