Áýe kompanııasynyń jańa múmkindikteri

Vetnamnyń basty iskerlik ortalyǵy sanalatyn Hoshımın qalasynda «Eır Astana» AQ ókildigi Qazaqstan Res­pýblıkasynyń Vetnamdaǵy elshi­liginiń qoldaýymen shahardaǵy jetek­shi týrıstik kompanııalar men avıa­genttikter úshin «Qazaqstanda toqtaý jasa – ár baǵytyńa iz qaldyr» degen taqyryppen semınar ótkizdi. Semınar elordada ótetin EKSPO-2017 halyqaralyq kórmesiniń qarsańynda osy aıtýly sharaǵa oraılas uıymdastyryldy. Jıynnyń betasharynda «Eır Astana» AQ-tyń Qıyr Shyǵys jáne Avstralııa bo­ıynsha óńirlik bas menedjeri Dhanvantrı Gýnetıleke sóz sóılep, «Hoshımın-Astana» áýe baǵytynyń múmkindikteri artyp kele jatqanyn, sol arqyly Vetnamnan Qazaqstanǵa, Qazaqstan arqyly TMD men Eýropa elderine týrısterdiń qatynaýy jyl sanap kóbeıip kele jatqanyn aıtty. Kompanııanyń óńirlik ókili «Eır Astananyń» Almaty men Astanadaǵy habtardan jasalatyn 60-tan astam halyqaralyq jáne ishki reısterdi qamtıtyn jelige ıe ekendigin tilge tıek etti.  Gýnetıleke myrza aıtyp ótkendeı, «Eır Astana» «EKSPO-2017 resmı tasymaldaýshysy» eksklıýzıvtik mártebesi bar resmı seriktes bolyp tabylady. Keler jyly Astanaǵa kelgen jáne barlyq tranzıttik jolaýshylarǵa kór­mege tegin kirý quqyǵy berilmek. Osy jıynda Qazaqstan Res­pýb­lıkasynyń Vetnamdaǵy elshisi Beket­jan Jumahanov pen elshilik qyz­met­kerleri sóz sóıledi. B.Jumahanov «Eır Astananyń» áýe baǵyttary arqyly EKSPO-2017 kórmesi syndy asa iri ulttyq jobany ilgeriletýge tolyq múm­kin­dik bar ekenin atap ótti. Semınar barysynda qatysýshylar elimizge vızalaryn alý tártibi, EKSPO-2017 kórmesine oraı, Astanaǵa týrıs­terdi tartý isindegi vızalardy jeńil­detý týraly habardar boldy. Qa­tysý­­shylar nazaryna Qazaqstan men halyq­aralyq kórme týraly beınerolıkter, basqa da materıaldar usynyldy. «Egemen-aqparat»