Qazaqstanda birinshi ret

«IýNESKO klýbtary shyǵarmashylyq akademııasynyń» jobasy bolashaqqa jol tartty Osynaý biregeı jobany jaqyn kúnderde eki apta boıy Astanada Qazaqstan Respýblıkasynyń Tuń­ǵysh Prezıdentiniń Qorymen jáne Qazaq ulttyq óner ýnıversıtetimen birlese otyryp IýNESKO klýb­tarynyń Qazaqstan ulttyq fe­de­rasııasy ómirge keltirip, tusaýyn kesti. Joba jastardy ta­ǵattylyq rýhynda tárbıeleý jáne memlekettiń bolashaqtaǵy shyǵarmashylyq áleýetin qalyp­tastyrý maqsatynda daryndy óskeleń urpaqty damytýǵa ámbe qoldaýǵa baǵyttalǵan. 12-17 jas aralyǵyndaǵy 100 daryndy bala kórkemsýret, mýzyka, bı jáne án ónerleri ata­lymdary boıynsha aldyn ala konkýrstyq irikteýden ótti, olar eki aptalyq jedel oqý baǵ­darlamasyn ıgerdi. Eki negizgi tuǵyr-tııanaq – oqytý men damy­týǵa negizdelgen baǵdarlamaǵa óner salasyndaǵy jetekshi maman­dardyń kásibı sabaqtarynan bó­lek, kóshbasshylyq áleýetti damytý, jahandyq azamattyq pen «álem mádenıetin» qalyptastyrý jónindegi trenıngter men sheberlik synyptary engizilgen. Sondaı-aq, baǵdarlama aıasynda balalar elordanyń kórikti jerleri men Qazaqstannyń sulý tabıǵatynyń sımvolyndaı «Býrabaı» ulttyq parkine saıahat jasap, tamashalady. «Astana Operanyń» kameralyq zalynda bolǵan jeńimpazdardyń keń kólemdi gala-konsertine kórer­men qaýym mol jınaldy. Joba qorytyndysynda oryndalǵan jan tolqytar ǵajap shyǵarmalar, kóńildi shattandyrar jarqyn yrǵaqtar, quıqyljyǵan ásem bıler, kóz jaýyn alar kórkem kartınalar men músinder – mine, elimizdiń mártebeli metrleri men óner qaıratkerleri seksen saǵattyq qajyrly eńbekpen músin­dep shyqqan nátıje osyndaı. Atalmysh bastamanyń ózine tán erekshe áleýmettik sıpatyn atap ótken jón. Ol múldem aqysyz, tegin negizde uıymdastyryldy. Konkýrsqa qatysý úshin kerektisi – bar bolǵany Qazaqstannyń IýNESKO klýbtarynyń birine múshelik, daryn jáne odan arǵy damýǵa degen ynta. IýNESKO klýb­tary Qazaqstan ulttyq fe­dera­sııasy prezıdenti bylaısha oı qorytady: «Birinshi «IýNESKO klýb­tary shyǵarmashylyq akade­mııasynyń» stýdenti bolý quqyǵyn alý konkýrsyna barlyǵy 500-den astam úmitker qatysty. Ál­bette, balalardyń akademııa qa­byrǵasynda alǵan baǵa jetkisiz tájirıbesi men bilimi olardyń jan-júreginde óshpes áser qaldyrary sózsiz, al endi bireýleriniń kúlli taǵdyryn da ózgertip jibermek. Biz jobanyń dástúrge aınalyp, jyl saıyn budan da kóp balalardy qamtıtynyna, olardyń bolashaq ómirine joldama beretinine kámil senimdimiz». Nazar QASYM