Aımaqty aralaǵan «Altyn adam»

El Táýelsizdiginiń 25 jyldyǵy qurmetine arnalǵan tyń joba – «Ulttyq mýzeı seniń qalańda» mádenı týry Atyraý qalasynda jalǵasyn tapty. Kelýshilerdiń nazaryna «Ult­tyq mýzeıge saıahat» jáne 3D gra­fıkalyq beınerolıkteri usy­nyldy. Jergilikti turǵyndar táýelsiz Qazaqstannyń brendine aınalǵan elimizdiń eń qundy jádigerleriniń biregeıi «Altyn adamdy» tamashalaý múmkindigine ıe boldy. Ulttyq mýzeı atyraý­lyqtar nazaryna 10 sırek týyndyny usyndy. Sonymen qatar, oblystyq tarıhı-ólketaný mýzeıinde ótken is-shara «Mýzeıdegi tún» aksııasyna ulasty. – Bizdiń «Mýzeıdegi tún» aksııa­syn uıymdastyrýdaǵy maq­satymyz – táýelsizdiktiń sımvoly «Altyn adam» jádigerin oblys halqy tolyq kórse degen nıetten týyndaǵan. Sondaı-aq, jastarǵa qurt, jent, dıirmenmen tartyp, tarydan talqan alý sekildi ulttyq taǵamdardyń daıyndalý tásilin, arheologııa salasy boıynsha qysh qumyra jasaýdan sheberlik sabaǵyn ótkizý arqyly salt-dástúrden alshaqtamaýdy dáripteıdi. Sharaǵa kelýshilerge arnap «synaq» oıynyn uıymdas­tyryp otyrmyz. Máselen, eki topqa bólinip, ıinaǵashpen sý tasý, aǵash úıdi qurý sekildi eptilik pen kúshtilikti aıqyndaıtyn jaıttardan súrinbeı ótkenderge murajaıdyń barlyq jádigerler bólmelerin aralap kórýge, sýretke túsý úshin tegin abonent beriledi, – deıdi oblystyq tarıhı-ólketaný mý­zeıiniń dırektory Rashıda Harı­pova. Aıta keteıik, «Ulttyq mýzeı seniń qalańda» aksııasy bıylǵy 27 maýsymnan Oral, Aqtóbe qala­larynan bastaý alyp, qala tur­ǵyndary yqylasyna bólengen bolatyn. Úsh kúnge sozylǵan mádenı týrǵa Atyraý oblystyq ákimdigi qoldaý bildirdi. Qarshyǵa KÚLEN