Fransýz qalasyn sharap tasqyny basyp qaldy
Fransııanyń tústigindegi Ero departamenti jerinde ornalasqan Seta qalasynyń kóshelerin bir mezgilde lekildeı aqqan sharap tasqyny basty da qaldy.
Tamyzdyń 3-i kúni oryn alǵan bul oqıǵany polıseıler jergilikti sharap óndirýshiniń narazylyqpen jasaǵan búligi dep baǵalap otyr. Sebebi, sodan birneshe kún buryn sharap isi jónindegi aımaqtyq komıtet birneshe sharap óndirýshige ıspan sharabyn ákelip, baǵa dempıngin jasady degen aıyp taqqan eken. Osydan keıin sharapshylardyń kósheni birneshe myń lıtrlik sharap topanyna toltyryp jiberý oqıǵasy birneshe ret oryn alypty.
Kólik tizgininde ıtter otyr. Abaılańyz!
AQSh-tyń Ýeın qalasyndaǵy eki tóbettiń áreketi zamatynda kúlli álemge áıgili bolyp ketti. Olar kóshede turǵan avtomobıldi janyndaǵy sýpermarkettiń ishine kirgizip jibergen.
Bul ıtterdi bir áıel óziniń jol boıyna qoıǵan avtomobıliniń ishinde qaldyryp ketedi. Alaıda, ıesi ketken soń ózdi-ózi qalǵan tóbetter mashınanyń aldyńǵy oryndyǵyna otyrmaq bolyp talasyp jatyp, onyń qol tejegishine tıip ketedi. Sol-aq eken bıik jerde turǵan kólik toqtamastan qatty kelip, magazınniń syrtqy terezesinen uryp, ishke qoıyp ketedi. Bir jaqsy jeri, ondaǵy adamdar da, ıtter de eshqandaı zardap shekpepti.
Barak Obamanyń kishi qyzy óz betinshe tabys tappaqshy
AQSh prezıdenti Barak Obamanyń kishi qyzy – 15 jasar Sasha jazǵy kanıkýl kúnderi óz betinshe tabys tappaqshy bolyp jumysqa ornalasty.
Ol qazir balyq satatyn dúkenniń kassa apparatynda jumys jasap, ekspress-terezeden taǵamdardy berip turady. Biraq, prezıdenttiń fastfýd satyp júrgen qyzyn osynda bir mezgilde alty birdeı oqqaǵar jan-jaqtan qorǵap júredi.
Aıdy endi jeke adamdar da zertteı bastaıdy
AQSh úkimeti jeke adamdardyń Aıdy óz betterinshe zertteýlerine ruqsat berdi. Endi mundaı alǵashqy sapardyń 2017 jyly júzege asyrylatyn túri bar.
Osynyń nátıjesinde Moon Express kompanııasy toǵyz kılolyq ǵylymı apparatýra men jyljymaly modýldi jáne teleskopty attandyrǵaly otyr. Memlekettik emes sıpattaǵy bul voıajdyń basy 2007 jyly Google kompanııasy jarııalaǵan konkýrstan bastalǵan edi. Onyń bas júldesin 2010 jyly Moon Express utyp alyp, 20 mln. dollar syılyqqa ıe bolǵan. Osyǵan baılanysty kompanııa aldaǵy jyly Aıǵa lýnahod attandyrǵaly otyr.
Shekarashylar úshemderdi bir-birinen ajyrata almady
Taılandqa demalyp qaıtýǵa barý úshin ushaqqa otyrýǵa kelgen ata-analar aldynan kútpegen kedergi kezdesti.
Shekarashylar olardyń birge týǵan úshem uldarynyń sýretterin bir-birlerinen ajyrata almaı, aqyry bireýin ǵana shekara sheginen ótkizýge sheshim qabyldady. Sóıtip, máskeýlik erli-zaıypty Panchenkolar úshemniń bireýin ǵana alyp, Bangkokqa attanyp ketti. Al qalǵan eki balany aparý úshin eldegi ata-ájeleri shuǵyl qujat daıyndaýǵa kirisip ketipti.
Túrmede jatyp tapqanyn balalar úıine bergen
Mońǵolııada №429 túzetý mekemesinde jazasyn ótep jatqan Artag Tómórbaatar esimdi sottalýshy óziniń aılyq jalaqylaryn balalarǵa berýge sheshim qabyldady.
Ol memleketke keltirgen shyǵynyn óteý úshin túzetý kolonııasynda sypyrýshy bolyp jumys isteıdi eken. Biraq ol budan alatyn aqshasynyń azdyǵyna qaramastan, tólemnen qalǵandaryn túgel balalar úıine aýdaryp turatyn boldy. «Men 2013 jyldyń 24 qarashasynan beri jazamdy ótep jatyrmyn. Osy ýaqytta 110 myń týgrık aqsha jınadym. Endi sony nárestelerdi emdeý úshin balalar úıine aýdarýdy suraımyn», dep jazdy ol osyǵan oraı.
Avstralııalyq áıel 63 jasynda sábıli boldy
Avstralııanyń Tasmanııa aralynda turatyn, aty-jónin atamaýdy ótingen bir áıel 63 jasynda óziniń birinshi perzentin dúnıege keltirdi.
Osynshama jasqa kelip «jas ana» atanyp otyrǵan áıeldiń sharanasy 34 aptalyǵynda ishti jarý jolymen alynypty. Ol osy kezge deıin bala kótere almaı kelipti. Aqyrynda donorlyq embrıon tásilimen ekiqabat bolǵan. Áıel jóninde asa kóp derek aıtylmaıdy. Tek onyń kúıeýi 78 jasta ekeni ǵana belgili.
Aqparat agenttikteriniń materıaldary boıynsha daıyndaldy
