Rıo-2016: Boksshylardyń kestesi ózgerip jatyr

Búgin Rıo-de-Janeıroda Qazaqstan sportshylary dzıýdo, akademııalyq esý men júzýden ótetin jarystarǵa qatysady. Dzıýdodan áıelder arasyndaǵy beldesýler Astana ýaqytymen keshki saǵat 19.00-de bastalady. Onda irikteý kezeńi men shırek fınaldyq kezdesýler ótedi. Odan keıin saǵat 00.30-da 10 tamyzǵa qaraǵan túni dzıýdoshylar júlde úshin kúresedi. Osy kezde kórermender jartylaı fınaldyq, úshinshi oryn úshin beldesý men fınaldyq kezdesýdi tamashalaı alady. Dzıýdo jarysyna 63 kıloǵa deıingi salmaqtaǵy Marıan Ordabaeva qatysady. Akademııalyq esý jarysy saǵat 21.00-de bastalady. Oǵan Qazaqstannan Vladıslav Iаkovlev pen Svetlana Germanovıch qatysady. Al saǵat 22.50-den bastap júzýden 200 metrge brass ádisi boıynsha ótetin jarystar kórsetiledi. Bul synda kórermender Dmıtrıı Balandınniń jarysyn tamashalaı alady. Osylardyń barlyǵyn Kazsport telearnasy tikeleı efırde kórsetedi. «Qazaqstan» telearnasy saǵat 00.30-da aýyr atletıkadan tikeleı efırde translıasııa jasaıdy. Onda 63 kıloǵa deıingi salmaqtaǵy Karına Gorıcheva tuǵyrǵa shyǵady. Taǵy bir aıtatyn nárse, Olımpıadada boksshylardyń jekpe-jekteriniń kestesi ózgerip jatyr. Ony bizge «Egemen Qazaqstannyń» arnaýly tilshisi Baqtııar Taıjan habarlady. «Búgin Danııar Eleýsinov pen Ivan Dychko jekpe-jekterin ótkizýi tıis», dedi ol. Dastan KENJALIN