«Qaıtqan kartochkada qaıyr bar»

Qazir ozyq tehnologııanyń damyǵan zamany ǵoı. Onsyz tirshiligimizdi elestetýdiń ózi qıyn. Bul tehnologııalarsyz adam balasy buryn qalaı ómir súrdi eken? Álde zamany susty bolǵanda, adamy myqty bolǵan ba? Keıde tipti, osylaı qazirgi ınnovasııalyq tehnologııalarmen kóne zamannan beri kún kórip kele jatqandaı kúı keshemiz. Qalaı bolǵanda da, qazir ınnovasııalyq tehnologııa artqan saıyn ómir súrýge qolaılylyq kúsheıip keledi. Bir ǵana uıaly telefondy alyp qarańyz. Qanshama paıdasy bar. Kádimgi kómekshi qural. Qarapaıym saǵat qyzmeti, kúntizbesi degenderin bylaı qoıǵanda, talaı adam bir-birinen habarsyz, adasyp júrer me edi. Jarar, kez kelgen jerde sýretke túsip, ınternetti aqtarmaı amaldaýǵa bolady degenniń ózinde. Biraq, basqany bilmeımin, ózim bul qurylǵysyz kádimgideı qınalyp qalatyn bolyppyn. «Aıshylyq alys jerlerden jyldam habar alǵyzǵan» telefon qurylǵysynyń «qudireti» kúshti. О́mirimizge enip jatqan ár saladaǵy ınnovasııalyq tehnologııalardyń qyzyǵyn kór­setýdiń quraly qazir osy telefon bolyp otyr. Bulaı deýime ótkende óz basymnan keshken myna jaǵdaı taǵy da sebep boldy. Ádettegideı asyǵys edim. Árı­ne, «taý qoparyp, tas jaryp jatqan» eshkim joq, jáı ǵana qalanyń qarbalas tirligi. Qarjymnyń qaltadaǵysy túge­silgen soń, kartochkadaǵysyn alaıyn dep, jolaı bankomatqa soqtym. Asyǵystyqtan aqsha­ny ǵana alyp kartochkany qaldy­ryp ketsem kerek. Alaıda, ózim ony bilmeımin. San sharýa shyr­mal­ǵan oı basqamen álek. Sóıt­kenshe bolǵan joq, qolym­daǵy uıaly telefonyma «shıq» etip sms-habarlama tústi. Mine, qyzyq: «Karta umytyldy. Ban­komatqa keıin qaıtyńyz» deıdi. Ban­komatka júgirip barsam, kar­tochkam kórinbeıdi. «Qap, jut­ty-aý» degenimshe bolǵan joq, bankomat ekranyndaǵy ko­dyńyzdy terińiz degendi kózim shaldy. Tere salyp edim, kartoch­kam atyp shyqty. Árıne, kartochka meni kútip syrtta tursa bireý-mireý alyp ketýi de múmkin ǵoı. Alaıda, bankomattyń aqyl­dysyn-aı, qupııa sıfrlardy tergen soń ǵana ózime berdi. Qýanyp kettim. Endi qaıteıin, buryn osy «jutyp qoıý» degennen zárem qalmaıtyn. Árıne, ol – ýaqyttyń sory. Onyń ózinde bankomatta tas­tap ketkenińdi birden esińe túsire qoısań ıgi. Qaltadaǵy aqshany taýysqansha ony izdemeýiń de múmkin. Al dál kerek kezinde sharq uryp, sońynda bankomatqa baryp, kerek bolsa, kezekke turyp ótinish jazyp, alyp ketýińe týra keletin. Ári ol banktegiler ban­ko­mattardy aralap, seniń umy­typ ketken kartochkalaryńdy jınap alyp ketken soń ǵana múm­kin. Al endi myna ádisti oılap tapqan tehnologııadan qalaı aınalmassyń. Innovasııanyń, jańa tehnolgııanyń adamǵa qyz­meti degen osy bolar. Áıteýir ózim Qazkommersbanktiń bul jańalyǵyna qatty qýandym. Mun­daı habarlamany alý úshin tele­fonyńyzdyń nómiri kartochka alǵan banktegi málimetterińizdiń qatarynda bolýy kerek eken. Sóıtip, kartochkam bankomatta qalmaı, qaltaǵa tústi. Adamnyń qa­tysýynsyz, tek tehnıkanyń arqasynda kómek aldym. Kerek deseńiz, janymda bul qyzmeti úshin alǵys aıtar da eshkim joq. Biraq tek turmastyń ádetimen álgi sms kelgen nómirge «rahmet» dep qalaı jaýap jazyp jibergenimdi de baıqamaı qalyppyn. Dınara BITIKOVA, «Egemen Qazaqstan»