Abyroıymyzdy asyrǵan aýyr atletter

Kúni keshe ǵana óziniń máresine jetken XXXI jazǵy Olımpııalyq oıyndar Qazaqstan qurama komandasy úshin jetistikpen aıaqtaldy. Bizdiń sportshylarymyz osy aıtýly alamanda jalpy sany 17 medal jeńip alyp, munyń aldyndaǵy Beıjiń men London Olımpıadalarynda kórsetken kórsetkishterinen 4 júlde alǵa ketti. Aqıqatyn aıtsaq, biz Oıyn­darǵa attandyryp salǵan sań­laq­­tary­myzdyń el namysyn qoldan ber­meý jolynda baryn salatyn­daryna qansha jerden senimdi bol­­ǵanymyzben, olardyń tap osyn­­shalyqty dárejede tabys bıi­ginen kórine alatyndaryn al­dyn ala boljaı qoıǵan joq edik. Buǵan tap osy jahandyq jarys basta­lar qarsańynda eki birdeı Olım­pııalyq oıyndardyń chempıo­ny Ilıa Ilın men London Olım­pıadasynda top jarǵan Zúlfııa Chınshanlo, Maııa Maneza jáne Svetlana Podobedova bastaǵan aýyr atletter quramasy sapynyń dopıng daýy saldarynan seldirep qalýy tikeleı sebepshi boldy. Buǵan qosa, álemdik jarystarda chempıon atanyp, júldeli oryndardan kórinip júrgen Jasulan Qadyrbaev, Almas О́teshov sekildi jańa tolqyn ókilderiniń de osy janjaldyń shýymen Oıyndarǵa jiberilmeýi jaǵdaıdy odan beter qıyndata tústi. Keıin Rıodaǵy aýyr atletter saıysynyń qorytyndylary kórsetkendeı, biz tek osynyń nátıjesinde ǵana keminde eki altyn medaldan qaǵylǵan ekenbiz. Degenmen, negizgi quramnyń ornyn basyp, Atlant muhıtynyń arǵy betine jol tartyp ketken tarlandar da namysty ońaılyqpen qoldan bere qoımady. Olar múmkindigi bolǵanynsha London tórinde aıdy aspannan bir-aq shyǵarǵan shoqtaı shoǵyrdyń jeńisti jolyn jalǵastyryp áketýge kúsh salyp baqty. Túptep kelgende, bul óziniń oń nátıjesin berdi. Sóıtip, aýyr atletterimiz Rıo tuǵyrynda 1 altyn, 1 kúmis jáne 3 qola medaldi qorjynǵa salyp, saıys kóshbasshylarynyń qatarynan tabyldy. Munda Nıdjat Rahımov (77 kg) – altyn, Jazıra Japparqul (69 kg)  – kúmis, al Farhat Harkı (62 kg), Karına Gorıcheva (63 kg), Aleksandr Zaıchıkov (105 kg) qola medaldardyń ıegerleri atandy. Bulardan bólek, jarysta Arlı Chonteı (56 kg) men Denıs Ýlanov (85 kg) – tórtinshi, Margarıta Elıseeva (48 kg) besinshi boldy. Aýyr atletter básekesinde bas jattyqtyrýshy Alekseı Nı jetekshilik etetin qazaqstandyq ziltemirshiler alǵan medaldarynyń sany boıynsha komandalyq esepte besinshi orynǵa shyqty. Al medaldardyń jalpy sany jaǵynan qytaılyq áriptesterinen keıingi ekinshi satyǵa ornalasty. Jarys sońynda Aspanasty eli jamaǵaty qorjynynda 7 medal bolsa, bizdiń ortaq qazynamyzǵa 5 júlde tústi. Qalǵan komandalardyń barlyǵy medaldar sany jaǵynan jerlesterimizden qalyp qoıdy. Osynyń ózi qazirgi tańda elimizde aýyr atletıkanyń ózindik mektebi qalyptasyp, dástúri ornyǵa túskenin anyq ańǵartady. Bir zamandary, 1980 jyly Vıktor Mazınniń Máskeý Olımpıadasynda, 1988 jyly Anatolıı Hrapatyıdyń Seýl Oıyndarynda altyn júlde alýmen bastalǵan jeńisti joldary táýelsizdik jyldarynda jańasha jalǵasty. Budan ári 1996 jyly Atlantada – Hrapatyı, 2004 jyly Afınada – Sergeı Fılımonov, 2008 jyly Beıjińde Irına Nekrasova, Alla Vajenına el qorjynyna kúmis medaldar saldy. Al Ilıa Ilın Beıjińde alǵash ret chempıon atanyp, egemen elimizdiń aýyr atletıkadaǵy birinshi altyn medalin alyp berse, Marııa Graboveskaıa sol joly qola medalge qol jetkizdi. Rıo-de-Janeıro oıyndary Qazaqstan komandasynda erteńinen úmit kúttiretin jas tolqynnyń jetkilikti ekenin kórsetip berdi. Serik PIRNAZAR, «Egemen Qazaqstan»