Zere áje – zerdemizde

Taıaýda tarıhı Semeı qalasy men Jarma aýdanynyń ortalyǵy Qalbataýda eki kúnge sozylǵan aıtýly eldik shara ótti. Shákárim atyndaǵy Semeı memlekettik ýnıversıteti men atalǵan aýdan ákimdigi birigip, «Uly Dalanyń uly analary» atty respýblıkalyq ǵylymı-tájirıbelik konferensııa uıymdastyrdy. Ǵylymı jıynǵa Astana men Almaty qalasynan jáne elimizdiń barlyq oblystarynan kelgen belgili ǵalymdar, aqyn-jazýshylar, qoǵam qaıratkerleri qatysty. Konferensııa minberine Sh.Ýálıhanov atyndaǵy Tarıh jáne etnologııa ınstıtýtynyń dırektory, QR UǴA korrespondent-múshesi Hangeldi Ábjanov, etnograf, professor, tarıh ǵylymdarynyń doktory Ahmet Toqtabaı, fılologııa ǵylymdarynyń doktory, professor Arap Espembetov, Qazaqstannyń halyq ártisi, «Birjan sal», «Qunanbaı» syndy kórkem fılmderdiń rejısseri ári basty rólderdi somdaýshy Dosqan Joljaqsynov, Mádenıet qaıratkeri, Zere rólin sátti oınaǵan Nursıpat Salyqova, tarıh ǵylymdarynyń doktory, professor Álimǵazy Dáýlethan, Shyǵys Qazaqstan ýnıversıtetiniń prorektory, fılologııa ǵylymdarynyń doktory, professor Baýyrjan Erdembekov, taǵy da basqa tulǵalar kóterilip, mazmundy baıandama jasady, shyǵarmashylyq tájirıbelerin ortaǵa saldy. Ýnıversıtet rektory Meıir Esken­dirov pen aýdan ákimi Nurlan Sydy­qov konferensııa jumysyn júıeli úı­les­tirdi. Qundy pikirler jaryssózge shyǵýshylar tarapynan da aıtyldy. Osy kúni tústen keıin Semeı qala­sy­nyń jurtshylyǵy ýnıversıtette «Qunanbaı» kórkem fılminiń rejısseri Dosqan Joljaqsynovpen jáne Jam­byl oblystyq drama teatrynyń ártisi Nur­sıpat Salyqovamen kezdesip, týyndynyń jasalý erekshelikterimen tanysty. Tar­tymdy suraqtar qoıylyp, tushymdy jaý­aptar alyndy. Keshkisin «Eńlik – Kebek» kınoteatrynda «Qunanbaı» fılmi kórsetildi. Kelesi kúni Jarma aýdanynyń ortalyǵy – Qalbataýda Zere áje eskert­kishin ashý saltanaty ótti. Músin ústindegi aq jamylǵy sypyrylǵanda, jurtshylyq jaqsylyqqa qushtar nemeresin aldyna alyp otyrǵan abyz áje beınesin kórip, qýanyp qaldy. Áje – Zere  Bektemirqyzy, bala – jasynan uǵymtal balaqaı Abaı sulbasy ekenine qanyqty. Eskertkish avtorlary – ákeli-balaly Ertis jáne Erkebulan Tátı. Ekeýi de – ustaz. Abaı aýdanynyń azamaty. Semeı óńiri bulardy izdengish, shyǵarmashyl pedagogtar retinde jaqsy tanıdy. Ásirese, áke Tátı temirden túıin túıedi. Zere áje eskertkishi – ult anasynyń, el ájesiniń jıyntyq beınesi. Rámizdi es­kertkish. Zere – rýhanı tólqujatymyzǵa aı­nalǵan Abaıdyń ájesi retinde de ult danalyǵynyń bastaýy. «Abaı jo­ly» roman-epopeıasy arqyly Zere beı­nesin – ult berekesi men dástúri keı­pinde somdap shyqqan dara jazýshy Muh­tar Áýezov taǵylymy endi qoladan quı­yl­ǵan týyndy túrinde jalǵasyn tapty. Jambyl TILEP