Jetiaraldaǵy jańa mektep

«Nurly Jol» baǵdarlamasy aıasynda paıdalanýǵa berildi Barqytbel baýyryndaǵy Jetiaral aýylynyń oqýshylary jańa oqý jylyn jańa mektepte bastady. Apatty jaǵdaıdaǵy mektepti almastyrǵan atalǵan nysan «Nurly Jol» baǵdarlamasy aıasynda salyndy. 300 oryndyq jańa ǵımarattyń sport zaly men ashanasy bar, synyp bólmeleri men dálizderi keń ári jaryq. Jańa bilim ordasynyń aýlasynda soǵylǵan alǵashqy qońyraý úni aýyl turǵyndaryn qýanyshqa bóledi. Ǵımarattyń ashylý saltanatynda sóılegen el azamattarynyń aq tileginen soń mektep dırektory Baqyt Aldaýyshovqa jańa ǵımarattyń kilti tabys etildi. Aıta ketken abzal, bul nysannyń qurylysy belgilengen merziminen úsh aı buryn paıdalanýǵa berilip otyr. Ata-analar mektepti mer­ziminde jáne sapaly salyp bergen merdiger mekemeniń jetekshisi, jergilikti kásipker Qaırat Qojah­metovke aıryqsha alǵys aıtty. – «Sen qandaı baqytty ediń, keler urpaq» degen aqyn óleńi osyndaıda eske túsedi. Jetiaralǵa az jyldyń ishinde kóp ózgerister endi. Jetpisinshi jyldary salynǵan burynǵy mektep 1991 jylǵy zilzaladan keıin komıssııa sheshimi boıynsha apattyq jaǵdaıda dep tanylǵan bolatyn. Balalar sodan beri eski mektepte oqyp keldi. Endi alystaǵy eldi mekende qalanyń ózinde kezdese bermeıtin barlyq múmkindigi bar bilim shańyraǵy salyndy, – dedi aýyldastarynyń ortaq qýanyshyn jetkizgen eńbek ardageri Baı­muhambet Nursadyqov. Jetiaraldyq ustazdar men oqýshylardy zamanaýı bilim ordasynyń ashylýymen qut­tyq­taǵan aýdan ákimi Dildábek Orazbaev sáýletti mektepke kirgen balalardyń bolashaqta úlken bıikterden kórinýin qalaıtynyn aıtyp, jaqsy bilim alýlaryna tilektestigin bildirdi. Aýyldyq okrýg ortalyǵynda boı kótergen qos qabatty bilim ordasy lıngafon, ınteraktıvti taqta jáne taǵy basqa qajetti materıaldyq qundylyqtarmen qamtamasyz etilgen. Synyp bólmelerine qoıylǵan kompıýterler men jıhazdardyń barlyǵy jap-jańa. Sondaı-aq, partalardyń barlyǵyna qol jýatyn sanıtarlyq toraptar tartylǵan. Dýman ANASh, «Egemen Qazaqstan» Shyǵys Qazaqstan oblysy, Tarbaǵataı aýdany