Kóshpelilerdiń Búkilálemdik ekinshi oıyndary ashyldy (foto, vıdeo)

Búgin, 3 qyrkúıek kúni keshke Qyrǵyzstannyń Ystyqkól oblysynyń ortalyǵy - Cholpon-Ata shaarynyń ıppodromynda Kóshpelilerdiń búkilálemdik ekinshi oıyndary saltanatty jaǵdaıda ashyldy. Kóshpeliler órkenıeti búginde kúlli adamzat balasy úzdik úlgi retinde kerek etip otyrǵan turaqty damýdyń bastapqy qalpy bolyp tabylady. Bul týraly osynda ótken Kóshpelilerdiń Búkilálemdik ekinshi oıyndarynyń ashylý barysynda sóz sóılegen Qyrǵyzstan prezıdenti Almazbek Atambaev aıtty. Onyń aıtýynsha, BUU-nyń damýdaǵy basty maqsaty osyǵan baǵyttalǵan.

Prezıdent óz sózinde Oıyndarǵa qatysýshylar men qonaqtardy osynaý orasan zor ordaly oqıǵamen quttyqtady. Ol eldiń bir mezgilde 62 memlekettiń 1 myń adamǵa jýyq sportshydan turatyn úlken delegasııasyn qabyldaýǵa qaýqarly bolyp otyrǵanyna maqtanysh sezimin bildirdi. A.Atambaevtyń sózine qaraǵanda, festıvalge sondaı-aq Qyrǵyzstannyń árbir oblysynan ókilder kelgen. «Qyrǵyzdar qonaqty qutty adam dep sanaıdy. Úıge qansha qonaq kelse, sonsha qut ta kiredi, deıdi olar. Sondyqtan qyrǵyzdar qashannan qonaqtardy qurmetpen jáne meımandostyqpen qarsy alady. Dál búgingi sııaqty», - dedi ol.

Qyrǵyz eli prezıdentiniń pikirinshe, Kóshpeliler oıyndaryna qyzyǵýshylyq bildiretin elderdiń qatary udaıy artyp keledi. Budan nebári 2 jyl buryn ǵana ótken birinshi Oıyndarǵa 19 eldiń ókili kelgen bolsa, qazir bul sıfr 62-ge jetip otyr. Budan artyq qandaı dálel kerek! A. Atambaev óziniń sózinde Kóshpelilerdiń Búkilálemdik ekinshi oıyndaryn ótkizýge qoldaý kórsetken birqatar elderdiń prezıdentterine alǵys aıtty. Qyrǵyzstan prezıdenti sońynda Oıyndardy ashyq dep jarııalady. Damır QOJAMQUL https://youtu.be/tRVkBq_aG3c