Elbasy "Alibaba Group" basshysy Djek Mamen kezdesti

Qytaıdyń Hanchjoý qalasynda ótip jatqan G20 sammıti barysynda Prezıdent Nursultan Nazarbaev "Alibaba Group" dırektorlar keńesiniń tóraǵasy Djek Mamen kezdesti dep habarlaıdy akorda.kz. Kezdesý barysynda kompanııamen yntymaqtastyqty damytý jáne onyń Qazaqstandaǵy qyzmeti aıasyn keńeıtý perspektıvalary, sonyń ishinde elektrondy kommersııa men tólem júıelerin ıntegrasııalaý salasyndaǵy birlesken jobalardy iske asyrý máseleleri talqylandy. Memleket basshysy bizdiń el Qytaıdaǵy elektrondy saýda salasynyń úzdigi bolyp sanalatyn jáne sol baǵytta zor jetistikke jetken «Alibaba Group» qyzmetiniń tájirıbesin zertteýge múddeli ekenin atap ótti. – Men sizdiń kompanııamen seriktestikti qoldaımyn. Bizdiń ulttyq kompanııamyz – «Qazposhtanyń» «Alibaba Group» kompanııasymen ózara tıimdi is-qımyl jasaýǵa barlyq múmkindigi bar. Jalpy, sizderdiń kompanııalaryńyz tárizdi kásiporyndar álemdik ekonomıkanyń ornyqty damýy men turaqtylyqtyń faktory bolyp sanalady. Álemdi saıası fragmentasııalaý, shekaralardy jabý jáne ózara sanksııa salý beleń alǵan qazirgideı jaǵdaıda sizder bul kedergilerdi tabysty eńserip, halyqaralyq saýdanyń damýyna yqpal etip otyrsyzdar, – dedi Nursultan Nazarbaev. D.Ma Qazaqstanda kompanııanyń bastamalaryna qoldaý kórsetilip otyrǵany úshin alǵys aıtyp, aldaǵy kezeńge arnalǵan jumys josparlary týraly aıtyp berdi. Sondaı-aq, «Alibaba Group» dırektorlar keńesiniń tóraǵasy elimizben seriktestik qarym-qatynastyń odan ári damı beretinine senim bildirdi.