Qytaı Ońtústik Koreıada zymyranǵa qarsy júıe ornatýǵa qarsy

Qytaı amerıkalyq THAAD zymyranǵa qarsy qorǵanys (ZQQ) júıesiniń Ońtústik Koreıa aýmaǵyna ornalastyrylýyna qarsy. Bul týraly Qytaı tóraǵasy G20 sammıti alańynda Ońtústik Koreıa prezıdentimen ótken kezdesý barysynda málimdedi. «Máseleniń durys rettelmeýi óńirdegi strategııalyq turaqtylyqty qamtamasyz etýge kómektespeıdi, tipti, qazirgi shıelenisterdi odan ári qıyndatyp jiberýi múmkin», dep atap ótti Sı Szınpın. THAAD júıesi áreket etý radıýsy shaǵyn jáne ortasha bolatyn zymyrandardy bıiktikte qaǵyp áketýge arnalǵan. Seýldyń málimdeýinshe, zymyranǵa qarsy qorǵanys júıesiniń áreket etý radıýsy 200 shaqyrymnan aspaıdy jáne ol Soltústik Koreıanyń arandatýshylyq áreketterine qarsy baǵyttalǵan. Sondaı-aq Ońtústik Koreıa bıligi zymyranǵa qarsy júıeni el aýmaǵyna 2017 jyldyń sońynda ornalastyrý josparlanyp otyrǵanyn jetkizdi. Phenıan Ońtústik Koreıanyń bul áreketine áldeqashan qarsylyq bildirgen bolatyn. Qazir olar joba júzege asyrylǵan jaǵdaıda, oǵan qarsy áskerı áreketke baratynyn eskertýde. Sonymen qatar, Reseı de Vashıngton men Seýldyń maqsattary jaıynda alańdaýshylyq bildirdi. Aıdar О́RISBAEV